काठमाडौँ — नेपाल र भारतबीच आर्थिक सहकार्यलाई थप सुदृढ बनाउने उद्देश्यसहित नेपाल–भारत चेम्बर अफ कमर्स एन्ड इन्डस्ट्री (निक्की) र फेडेरेसन अफ इन्डियन चेम्बर अफ कमर्स एन्ड इन्डस्ट्री (फिक्की) ले आपसी व्यापार, लगानी तथा सीमापार व्यापार प्रवर्द्धन गर्न संयुक्त रूपमा काम गर्ने समझदारी गरेको छ । 

निक्कीका अध्यक्ष सुनील केसी र फिक्कीकी महाप्रबन्धक ज्योति बिजद्वारा नयाँदिल्लीमा हस्ताक्षरित समझदारीअनुसार दुवै संस्थाले व्यापारिक प्रतिनिधिमण्डलको आदानप्रदान, गैरगोप्य सूचनाको साझेदारी र संयुक्त प्रवर्द्धनात्मक कार्यक्रम आयोजना गर्नेछन् । साथै निक्की नेपालका लागि फिक्कीको विशेष साझेदारका रूपमा रहने र फिक्की भारतका लागि निक्कीको विशेष साझेदार रहने पनि बताइएको छ ।

समझदारीमा दुवै पक्षले व्यापार र लगानीसम्बन्धी विविध प्रकाशन र तथ्यांक नियमित रूपमा आदानप्रदान गर्ने पनि उल्लेख छ । ‘हामी प्रत्येक वर्ष कम्तीमा एउटा प्रमुख संयुक्त कार्यक्रम आयोजना गर्नेछौं । नेपाल तथा भारतका व्यवसायीहरूबीच प्रतिनिधिमण्डलको आदानप्रदानलाई सहयोग गर्नेछौं,’ निक्कीका अध्यक्ष केसीले भने, ‘हाम्रो साझेदारीले संयुक्त अध्ययन, बजार सर्वेक्षण तथा आर्थिक विकास एवं चासोका नयाँ क्षेत्र पहिचान गर्न प्रकाशन आदानप्रदानसमेत समेट्नेछ ।’

फिक्कीकी महानिर्देशक ज्योति बिजले पनि आर्थिक सम्बन्धलाई सुदृढ बनाउने दुवै संस्थाको साझा जिम्मेवारी रहेको बताइन् । ‘हामी आ–आफ्नो देशका प्रमुख व्यावसायिक संस्थाका रूपमा भारत र नेपालबीचको व्यापार तथा लगानी सम्बन्ध बलियो बनाउने प्रतिबद्धतासाथ अघि बढिरहेका छौं,’ उनले भनिन् ।