१० महिनामा दोस्रो ठूलो राजस्व चुहावटको मुद्दा सुन–चाँदीको चोरी पैठारी छ । त्यसमा राजस्व छली गरेको अभियोगमा १ अर्ब ३४ करोडको मागदाबीसहितको मुद्दा दायर गरिएको छ । उक्त मुद्दामा प्रतिवादी भने ४७ जना छन् । 

यस अवधिमा राजस्व चुहावटतर्फ करिब सवा पाँच अर्बको मागदाबीसहित ४८ वटा मुद्दा दर्ता गरिएको छ । चालु वर्षको साउनदेखि जेठ मसान्तसम्म राजस्व चुहावटतर्फ १ सय ६० जनाविरुद्ध मुद्दा दायर गरेर उनीहरूबाट चुहावट भएको राजस्व असुली गर्नुपर्ने माग गरिएको छ ।

उनीहरूलाई कानुनअनुसार ५ वर्षसम्म जेल सजाय माग दाबी गरिएको छ । विभागले गत शुक्रबार सार्वजनिक गरेको विवरणअनुसार राजस्व चुहावटसँग सम्बन्धित २ अर्ब ५९ करोड बिगो तथा शतप्रतिशत जरिवानासमेत ५ अर्ब १९ करोड मागदाबीसहित उच्च अदालतमा अभियोजन गरिएको छ । 

यस अवधिमा विभागले विभिन्न फर्म तथा कम्पनीबाट राजस्व चुहावट भएको ठहर गरी १ अर्ब १६ करोड धरौटी माग गरेको छ । घिमिरेका अनुसार राजस्व चुहावटको धरौटी रकममध्ये ५५ करोड १८ लाख आन्तरिक राजस्व विभाग र भन्सार विभागमा असुलीका लागि पठाइएको छ । 

विदेशी मुद्रा अपचलनतर्फ १ सय ६१ जनाविरुद्ध विभिन्न जिल्ला अदालतमा मुद्दा दायर गरिएको छ । १ सय १७ वटा मुद्दामा बिगो र जरिवानासमेत ५ अर्बभन्दा बढी मागदाबी गरिएको विभागले सार्वजनिक गरेको तथ्यांकमा उल्लेख छ । विदेशी मुद्रा अपचलनमा गत चैतको पहिलो साता काठमाडौंको टोखाबाट बरामद भएको २५ करोड १९ लाख २४ हजार बराबरको युरो तथा अमेरिकी डलर सबैभन्दा ठूलो रकम हो । उक्त घटनामा चालक थुनामा छन् भने मुख्य अभियुक्त भनिएका सिन्धुपाल्चोकका नारायण पौडेल फरार रहेको विभागले जनाएको छ ।