बेइजिङ — नेपाल र चीनका स्वास्थ्य क्षेत्रका विज्ञहरूले आपसी डिजिटल स्वास्थ्य प्रणाली आत्मसात् गर्दै अगाडि बढ्न सुझाएका छन् । प्रविधिको तीव्र विकासको फाइदा र असल छिमेकपनको लाभस्वरूप सहकार्यलाई गहन पार्नुपर्नेमा पनि उनीहरूको जोड छ ।

चीनको ग्वान्जाउस्थित नेपाली महावाणिज्य दूतावासले बिहीबार साँझ भर्चुअल र भौतिक तरिकामार्फत आयोजना गरेको ‘स्वास्थ्य सेवाको भविष्य सम्पर्क : नेपाल–चीन डिजिटल स्वास्थ्य सहकार्य’ विषयक कार्यक्रममा उनीहरूले यस्तो धारणा व्यक्त गरे । 

स्वास्थ्य तथा जनसंख्यामन्त्री प्रदीप पौडेलले भिडियो सन्देश पठाउँदै चिनियाँ उद्यमीहरूलाई नेपालको स्वास्थ्य क्षेत्रमा लगानी गर्न आमन्त्रण गरे । चीनले विगतदेखि नै नेपालको स्वास्थ्य सेवामा टेवा पुर्‍याउँदै आएको मन्त्री पौडेलको भनाइ छ । कोभिडदेखि नेपालको आयुर्वेदिक स्वास्थ्य क्षेत्रमा चीनले दिएको साथ र समर्थनको उनले प्रशंसासमेत गरे । नेपाल र चीनबीच इतिहासकालदेखि नै मैत्रीपूर्ण सम्बन्ध रहेको र यस वर्ष नेपाल–चीन दौत्य सम्बन्ध स्थापनाको ७०औं वार्षिकोत्सव भएको उनले सम्झिए । 

पछिल्लो समय प्रविधिको योगदानले स्वास्थ्य क्षेत्रले फड्को मारेको बागमती प्रदेशका स्वास्थ्यमन्त्री किरण थापा मगरले बताए । नेपालको दूरदराजमा भौगोलिक विकटताका कारण डिजिटल हेल्थ सिस्टम उपयोगी हुने उनले जनाए । चीनले नेपालका ठूला विपत्तिदेखि लिएर नियमित रूपमा स्वास्थ्य सहायता दिँदै आएको स्मरण गर्दै मन्त्री मगरले चीनको प्रविधिबाट नेपालको स्वास्थ्य क्षेत्र लाभान्वित हुन चाहेको प्रस्ट्याए ।

डिजिटल प्रविधि विलासिता नभएर समावेशी आवश्यकता भएको उनको भनाइ छ । बागमती प्रदेशले स्वास्थ्य स्तरोन्नतिका लागि चीनबाट लिएका प्राविधिक सहयोगबारे समेत उनले उल्लेख गरे । ग्लोबल डिजिटल अग्रणीका रूपमा चीनबाट पछिल्ला उन्नत प्रविधिबाट नेपालको स्वास्थ्य क्षेत्रले फाइदा लिन चाहेको उनले सुनाए ।

नेपालमा सिभिल हस्पिटलदेखि २०१५ भूकम्प वा कोभिड–१९ महामारीलगायतमा चीनको अतुलनीय सहयोगको महावाणिज्यदूत भरत खनालले स्मरण गरे । अबको जमाना प्रविधिमैत्री भएकाले डिजिटल हेल्थ सिस्टमको प्रभावकारिता बढ्दै जाने उनको भनाइ छ । ‘पहुँचयुक्त तथा सुलभ स्वास्थ्य सेवा तब मात्रै सम्भव हुन्छ, जब सबैका लागि डिजिटल हेल्थ केयरको अवधारणा विकास गर्न सकिन्छ,’ उनले भने । नेपाल सरकारले पनि डिजिटल प्रविधिलाई प्राथमिकतामा राखेको र प्रविधिमा फड्को मारेको चीनबाट सहकार्यको अपेक्षा गरिएको उनले जनाए ।