दार्चुलाको मालिकार्जुन र खलंगा–हिकिला खण्डमा कालोपत्रका लागि काम भइरहेको छ । महाकाली करिडोर योजनाअन्तर्गत कञ्चनपुरको ब्रह्मदेवदेखि दार्चुलाको तुसारपानीसम्म ३ सय ३४ किलोमिटरमध्ये कञ्चनपुरमा ११ किलोमिटर, डडेलधुरामा ५८, बैतडीमा १ सय ४४ र दार्चुलामा १ सय २१ किलोमिटर सडक पर्छ । तुसारापानीदेखि टिंकरसम्मको ७९ किलोमिटर सडक खण्डमा ट्र्याक खोल्ने काम नेपाली सेनाले गरिरहेको छ । 

सरकारले महाकाली करिडोरलाई रणनीतिक सडकका रूपमा अघि बढाइरहेको छ । तर यसमा बर्सेनि बजेट भने अभाव नै हुने गरेको छ । यस क्षेत्रका बासिन्दा र जनप्रतिनिधिले समेत बेलाबेलामा बजेट अभावबारे चर्को विरोध जनाउँदै आएका छन् । उसो त महाकाली करिडोरको चर्चा सुरु भएको पनि डेढ दशकभन्दा बढी भइसकेको छ । हरेक चुनावमा यो विषय प्रमुख चुनावी एजेन्डा बन्ने गरेको छ । चुनावका बेला नेताहरूले कञ्चनपुरको दोधारा चाँदनीलाई दार्चुलाको टिंकर हुँदै तक्लाकोटसम्म जोड्ने नारा अघि सार्ने गरेका छन् । 

महाकाली किनारैकिनार दार्चुलासम्म मात्रै नभई सडक सञ्जालबाहिर रहेको दार्चुलाको उत्तरी क्षेत्रलाई समेत जोड्ने गरी करिडोर निर्माण भइरहेको हो । यसले महाकाली किनार क्षेत्रका बासिन्दालाई तराई आउजाउ गर्न दूरीसमेत छोटो हुनेछ । ‘यस वर्ष पनि बजेट अभावले लक्ष्यअनुसार काम भएन, आगामी वर्ष पनि त्यस्तै हुने जस्तो छ,’ इन्जिनियर जैसीले भने, ‘माग गरेअनुसार बजेट विनियोजन भए कामको गति बढाउन सकिन्थ्यो ।’