पाँचथर — राष्ट्रिय गौरवको मध्यपहाडी राजमार्गको सुरुवाती बिन्दुमा सडक निर्माणको काम लथालिंग बनेको छ । राजमार्गलाई विभिन्न तीन खण्डमा कालोपत्र गर्ने जिम्मेवारी लिएका रोशन शिवशक्ति जेभी र सन्तोषी शिवशक्ति जेभीले काममा लापरबाही गर्दा निर्माणले गति लिन नसकेको हो ।

हालसम्म यो सडकअन्तर्गतको पहिलो खण्डमा २७, दोस्रो खण्डमा १४ र तेस्रो खण्डमा ४९ प्रतिशत मात्रै काम भएको छ । जब कि यो सडक २०७८ सालमै पूरा भइसक्नुपर्थ्यो । 

निर्माण व्यवसायीले ज्याला भुक्तानी नदिएका कारण मजदुरले काम छाडेपछि मध्यपहाडी लोकमार्गअन्तर्गत ५१ किलोमिटर क्षेत्र लाथलिंग छ । विभिन्न तीन खण्डमा राजमार्ग कालोपत्र गर्ने जिम्मेवारी लिएका रोशन शिवशक्ति जेभी र सन्तोषी शिवशक्ति जेभीले भुक्तानी नदिएका कारण १ सय ५० जना कामदार १५ दिनअघि काम छोडेर हिँडेका छन् । ६ महिनादेखि काम गरेको ज्याला नपाएको उनीहरूको गुनासो छ । 

निर्धारित समयमा काम नसकेको कम्पनीलाई सरकारले पटक–पटक गरेर तीन पटक म्याद थपिदिएको छ । तेस्रो पटक थपिएको म्याद आउँदो मंसिरमा सकिँदै छ । सन्तोषी शिवशक्ति जेभीका कारण दोस्रो खण्ड झनै लथालिंग छ ।

पहिलो र तेस्रो खण्डमा पनि वर्षायाममा गाडी गुड्ने सम्भावना न्यून रहेको याङ्वरक गाउँपालिका–१ का वडा सदस्य नरबहादुर गुरुङ बताउँछन् । निर्माण व्यवसायीले कामदारलाई झन्डै एक करोड पारिश्रमिक भुक्तानी दिन बाँकी रहेको उनले जनाए । 

निर्माण व्यवसायी सुरेन्द्र पाठकले पटकपटक काम अगाडि बढाउने प्रतिबद्धता जनाए पनि आवश्यक औजार, उपकरण, यन्त्र र जनशक्ति नखटाएको मध्यपहाडी राजमार्ग आयोजना कार्यालय फिदिमको भनाइ छ । याङ्वरक–४ दारिम्बादेखि ओयाम वडा २ फलैंचा र वडा १ च्याङथापु हुँदै सिक्किमसँगको सीमावर्ती नाका चिवाभन्ज्याङ जोड्ने यो सडकको काम चाँडो सक्न पटकपटक ताकेता गर्दा पनि व्यवसायीले नटेरेको मध्यपहाडी लोकमार्ग आयोजना कार्यालय प्रमुख दीपेन्द्र पाण्डेले बताए । 

सडक कालोपत्र गर्ने ठेक्का लिएको निर्माण कम्पनी सन्तोषी शिवशक्ति जेभीका सञ्चालक पाठकले तीनवटै खण्डको ठेक्का पाउनु पनि दुर्भाग्यपूर्ण भएको पाण्डेको टिप्पणी छ । सडक लथालिंग हुँदा पाँचथरको याङ्वरक गाउँपालिका–१ २ र ३ सँगै छिमेकी जिल्ला ताप्लेजुङको सिदिङ्वा गाउँपालिका–१ र २ का बासिन्दालाई सास्ती भएको छ । वर्षायाममा यो ठाउँमा खाद्यान्न र दैनिक उपभोग्य वस्तु ढुवानीमा कठिनाइ हुनेमा स्थानीय चिन्तित छन् । 

जिल्ला प्रशासन कार्यालय आयोजना कार्यालय हुँदै मन्त्रीस्तरमा यो सडकको ठेक्का तोड्न छलफल भइरहे पनि त्यसले सार्थकता पाएको छैन । ठेक्का तोडिएपछि कसरी काम गर्ने भन्ने विषयमा अर्थ मन्त्रालय र भौतिक पूर्वाधार मन्त्रालयबीचको तादात्म्य नमिल्दा पनि सडकको यो अवस्था भएको हो ।

दारिम्बादेखि चिवाभन्ज्याङसम्मको ५१ किलोमिटर सडक कालोपत्र गर्न २ वर्षभित्र सक्ने गरी १ अर्ब २५ करोड रुपैयाँ लागतमा काम सक्ने गरी २०७६ माघमा शिवशक्ति निर्माण सेवाले सरकारसँग ठेक्का सम्झौता गरेको थियो । ठेक्का लिएको ६ वर्षसम्म यो सडकमा अपेक्षित प्रगति हुन सकेको छैन । 

यहाँको ओयाम खोला, ओसाम खोला र फलाम खोलाका पुलसँगै विभिन्न खोल्सामा लगाएका कल्भर्ट र कजवे गत वर्ष असार २ को वर्षाले बगेका थिए । यी खोला–खोल्सामा पानी नपर्दा जेनतेन गाडी र मान्छे तर्न सके पनि वर्षाका बेला वारपार गर्न सकिँदैन । 

शिवशक्ति निर्माण सेवाका प्रोपाइटर सुरेन्द्र पाठक भने सधैंझैं कोरोनाकाल, २०७९ को निर्वाचन हुँदै पेट्रोलियम पदार्थमा भएको मूल्यवृद्धिका कारण निर्धारित समयमा काम गर्न नसकेको दाबी गर्छन् । ठेकेदारले जेजस्तो बहाना बनाए पनि काममा पटक्कै ध्यान नदिएको आयोजना प्रमुख पाण्डेय बताउँछन् । ‘हिउँदभर कहाँ जान्छन्, वर्षा लाग्न थाल्दा २–४ कामदार ल्याएर फिल्डमा छोड्छन् । उनको यही प्रवृत्तिले सडक यो हालतमा पुगेको हो,’ पाण्डेयले भने । 

दारिम्बादेखि चिवाभन्ज्याङ जोड्ने यो सडकलाई तीन खण्डमा विभाजन गरेर ठेक्का लगाइएको छ । तीनवटै खण्डको ठेक्का शिवशक्ति निर्माण सेवाले ‘ज्वाइन्ट भेन्चर’ (जेभी) मा पाएको हो । पहिलो खण्डमा रोशन/शिवशक्ति जेभी, दोस्रो खण्ड सन्तोषी/शिवशक्ति जेभी र तेस्रो खण्ड रोशन/शिवशक्ति जेभीले ठेक्का लिएका छन् । यद्यपि तीनवटै खण्डका प्रोपाइटर भने सुरेन्द्र पाठक नै हुन् । वर्षा सुरु हुनुअघि करिब दुई घण्टामा पार गर्ने थर्पुदेखि च्याङथापुसम्मको २१ किलोमिटर सडक पार गर्न आजकाल दिनभर लाग्ने गरेको चालक मोहन लिम्बू सुनाउँछन् ।