काठमाडौँ — चालु आर्थिक वर्षका लागि ६६१ उद्यमी छनोट भएकामा हालसम्म ७८ जनाले ८ करोड २५ लाख रुपैयाँ स्टार्टअप कर्जा लिएका छन् । औद्योगिक व्यवसाय विकास प्रतिष्ठानले ९७ जनाले कर्जा लिन खाता खोलेको जनाएको छ । आगामी असारभित्र छनोट भएका सबै उद्यमीलाई कर्जा प्रवाह गर्ने प्रतिष्ठानले जनाएको छ ।

प्रतिष्ठानले गत भदौ ११ मा कर्जा प्रवाहका लागि परियोजना प्रस्ताव आह्वान गरेको थियो । त्यति बेला अनलाइन र भौतिक रूपमा उपस्थित भई ५ हजार १५८ उद्यमीले प्रस्ताव दर्ता गरेका थिए । तीमध्ये पुस १९ मा १ हजार ३१४ उद्यमी परियोजना प्रस्तुतीकरणका लागि छनोट भएका थिए । छनोट भएकामध्ये १ हजार ७३ उद्यमीले पुस अन्तिम सातादेखि चैतको दोस्रो सातासम्म परियोजना प्रस्तुतीकरण गरेका थिए । त्यसपछि गत वैशाख २१ मा स्टार्टअप कर्जा पाउन योग्य ६६१ उद्यमीको नाम प्रतिष्ठानले सार्वजनिक गरेको थियो । 

साथै वैशाख २६ मा कुन उद्यमी राष्ट्रिय वाणिज्य बैंकको कुन शाखामा जानेसमेत सूचना जारी गरेको थियो । कर्जाका लागि सिफारिस भएका उद्यमीले नामसूची सार्वजनिक भएको ४५ दिनभित्र तोकिएको बैंकको शाखा कार्यालयमा सम्पर्क नगरे परियोजना प्रस्ताव र सिफारिस रकम स्वतः रद्द हुने प्रतिष्ठानले जनाएको छ । 

चालु आर्थिक वर्षको बजेटमा सरकारले स्टार्टअप कर्जा प्रवाहका लागि १ अर्ब रुपैयाँ विनियोजन गरिएको छ । उद्योग, वाणिज्य तथा आपूर्ति मन्त्रालयका अनुसार विनियोजित बजेटबाट ३ प्रतिशतसम्म प्रतिष्ठानको प्रशासनिक खर्च, कर्जा सुरक्षा (बिमा) का लागि २५ प्रतिशत निक्षेप तथा कर्जा सुरक्षा कोषमा र बाँकी रकम उद्यमीहरूलाई प्रवाह गरिनेछ । प्रतिष्ठानले ७७ करोड ६० लाख रुपैयाँ कर्जा प्रवाह गर्ने जनाएको छ ।