काठमाडौँ — सेयर कारोबार मापक नेप्से परिसूचक सोमबार २३.१९ अंकले बढेको छ । अघिल्लो दिनको तुलनामा ०.८८ प्रतिशतले बढ्दा समग्र नेप्से २ हजार ६ सय ५३.०९ बिन्दुमा पुगेर बन्द भएको छ । अघिल्ला चार कारोबार दिन लगातार घटेको नेप्से सोमबार दोहोरो अंकले बढेको हो ।

गत मंगलबार ३५.७३, बुधबार ११.९७, बिहीबार ५.९९ र आइतबार ११.०६ अंकले नेप्से घटेको थियो । सोमबार भने बजार खुलदेखि नै सेयर बजार उकालो लागेको थियो । मध्याह्नमा नेप्सेमा उच्च अंकको सुधार भए पनि अन्त्यमा सवा २३ अंकको वृद्धि भएको हो । 

सोमबार नेप्से बढे पनि पछिल्ला साताहरूमा प्रायः दिन नेप्से घटेको छ । ब्याजदर न्यून अवस्थामा रहेको, वित्तीय प्रणालीको अधिक तरलता कायमै रहेको अवस्थामा सेयर बजारमा सकारात्मक असर पर्ने अनुमान धेरैले गरेका छन् । तर, बजारले अपेक्षाविपरीत प्रवृत्ति देखाउँदै आएको छ । सेयर बजार वृद्धिका लागि आवश्यक सूचकहरू सकारात्मक रहे पनि लगानीकर्ताको आत्मविश्वास बढ्न नसकेकाले नेप्से बढ्न नसकेको हो । 

सेयर बजार वृद्धिका लागि राष्ट्र बैंकले सेयर धितो कर्जाको जोखिम भार १५० प्रतिशतबाट घटाएर १ सय प्रतिशत मात्र कायम गरेको छ । बजार वृद्धिमा सकारात्मक टेवा पुर्‍याउने उद्देश्यले राष्ट्र बैंकले जोखिम भार घटाए पनि त्यसको सकारात्मक असर भने नेप्सेमा देखिएको छैन ।