काठमाडौँ — पछिल्ला ६ कारोबार दिनयता सेयर कारोबार मापक नेप्सेको गिरावट कायमै छ । साताको पहिलो दिन आइतबार नेप्से परिसूचक २.६९ अंकले घटेको हो । यो दिन शून्य दशमलव १० प्रतिशतले घटेर २ हजार ६ सय ९ दशमलव शून्य पाँच बिन्दुमा ओर्लिएको छ । गत वैशाख २५ यता नेप्से लगातार घटिरहेको छ ।

आइतबार कुल एक सय कम्पनीको सेयर मूल्य बढ्यो, १४५ कम्पनीको मूल्य घट्यो भने एक कम्पनीको मूल्य स्थिर रह्यो । कुल ७९ हजार ८९३ पटकको सेयर किनबेचबाट ८ अर्ब ५० करोड ९२ लाख रुपैयाँको सेयर कारोबार भएको छ । कुल १ करोड ६९ लाख ७ हजार ७३७ कित्ता सेयर किनबेच भएको छ । 

लघुवित्त, अन्य र होटल तथा पर्यटन उपसमूहबाहेक सबै उपसमूह घटे । लघुवित्त ५६.९८, अन्य उपसमूह ९४.९४ र होटल तथा पर्यटन ७६.६६ अंकले बढे । व्यापार १६४.८८, विकास बैंक १२६.२९, निर्जीवन बिमा १०९.२७ अंकले घटेको नेप्सेले जनाएको छ । 

नेप्से घटेसँगै कुल बजार पुँजीकरण ४ अर्ब २६ करोड ९९ लाख रुपैयाँले घटेको छ  । गत बिहीबार ४३ खर्ब ४४ अर्ब ७० करोड रुपैयाँ रहेको कुल बजार पुँजीकरण आइतबार ४३ खर्ब ४० अर्ब ४३ करोड कायम भएको छ । यसले उक्त अवधिमा नेप्से करिब ४ अर्ब २६ करोड रुपैयाँले खुम्चिएको देखाउँछ । कुल सूचीकृत सेयरलाई सोही दिनको सेयर मूल्यले गुणा गरेर कुल बजार पुँजीकरण गणना गरिन्छ । पुँजीकरण घट्नुको अर्थ सूचीकृत सेयरको बजार मूल्यमा कमी आउनु हो । यही आधारमा पुँजीकरण घट्दा लगानीकर्ताको सम्पत्तिको मूल्य घटेका रूपमा विश्लेषण गरिन्छ ।

ओम मेगाश्री फर्मास्युटिकल्सको सेयर मूल्य १० प्रतिशतले बढेर सर्किट ब्रेक लाग्यो । छ्याङ्दी हाइड्रोपावरको ९.९९, विन नेपाल लघुवित्तको ९.५३, नेपाल रि–इन्स्योरेन्स कम्पनीको ८.४१ र बाराही हाइड्रोपावर पब्लिकको ७.३२ प्रतिशतले सेयर मूल्य बढ्यो । कर्पोरेट डेभलपमेन्ट बैंकको ८.७१, नेपाल माइक्रो इन्स्योरेन्स कम्पनीको ७.५३, ग्रिन डेभलपमेन्ट बैंकको ६.९४, क्रेस्ट माइक्रो लाइफ इन्स्योरेन्सको ६.८६ र युनिभर्सल पावर कम्पनीको ६.७० प्रतिशतले सेयर मूल्य घट्यो ।