काठमाडौँ — मध्यपहाडी राजमार्गको निर्माण सुरु भएको १८ वर्ष पुग्यो,प्रगति बल्ल ८० प्रतिशत मात्र छ । आयोजनामा ठेक्का व्यवस्थापनको काम अझै हुन सकेको छैन । नयाँ ठेक्का गर्न सरकारले स्रोत सहमति नै दिएको छैन ।

आर्थिक वर्ष ०६४/६५ मा मध्यपहाडका २६ जिल्लाका २ सय १५ बस्ती जोड्ने भन्दै यो आयोजना सुरु गरिएको थियो । आयोजना सम्पन्न भएपछि १ करोड जनता लाभान्वित हुने अनुमान छ । 

पूर्वको पाँचथरस्थित चिवाभन्ज्याङबाट पश्चिमको बैतडीस्थित झुलाघाटसम्म दुई लेन कालोपत्र सडक बनाउने लक्ष्यअनुसार काम थालिएको हो । १ हजार ८ सय ७९ किमिमध्ये आयोजनाबाट १ हजार १६ दशमलव ०७ किमि सडक निर्माणको काम भइरहेको छ । ४ सय ६२ किमि सडक अन्य आयोजनाअन्तर्गत पर्छ । अहिलेसम्म योजना र डिभिजन सडकहरूबाट गरी १ हजार ४ सय ७८ दशमलव ७ किमि सडक मात्र कालोपत्र भएको छ ।

१ सय ३७ वटा पुलमध्ये अहिलेसम्म १ सय ८ वटाको मात्र निर्माण सकिएको छ । अहिले ९ खण्डमा १ सय ३७ किमि सडक, बाढीले क्षति गरेका सहित १६ वटा पुलको ठेक्का व्यवस्थापन हुन बाँकी छ । नयाँ ठेक्काकालागि १ अर्ब १५ करोड र ठेक्का तोडेर नयाँ गर्नुपर्ने सडक र पुलका लागि १ अर्ब ९६ करोड रुपैयाँ स्रोत सहमति माग गरिएपनि नपाइएको मध्यपहाडी राजमार्ग आयोजना निर्देशनालयका आयोजना निर्देशक रबिन्द्रलाल दासले बताए । स्रोत सहमतिकालागि सडक विभाग हुँदै गत कात्तिकमा चिठ्ठि अर्थ मन्त्रालय पठाइएको थियो । 

‘स्रोत सहमति पाउन नसक्दा थप ठेक्का गर्न पाइएको छैन,’ उनले भने, ‘जसले गर्दा समयमै आयोजनाको काम नसकिने र ढिला हुने जोखिम बढेर गएको छ ।’ अहिले ठेक्का गर्न नसकिए दुई वर्षसम्म काम नहुने उनले बताए । उनका अनुसार मध्यपहाडी राजमार्गअन्तर्गत केही ठेक्का सम्पन्न हुने चरणमा, केही रुग्ण र केहीमा राम्रो प्रगति छ ।