काठमाडौँ — सेयर कारोबार मापक नेप्से परिसूचक सोमबार १९.३० अंकले बढेको छ । गत वैशाख २५ यता लगातार घटिरहेको नेप्से जेठ ५ (सोमबार) शून्य दशमलव ७४ प्रतिशतले बढेर २ हजार ६ सय २८ दशमलव ३६ बिन्दुमा उक्लिएको छ ।

वैशाख २५ मा १२.०४, वैशाख २८ मा १२.५३, वैशाख ३० मा १४.८७, वैशाख ३१ मा १३.९६, जेठ १ मा ८.४१ र जेठ २ मा नेप्से २.७९ अंकले घटेको थियो । सोमबार कुल १८५ कम्पनीको सेयर मूल्य बढ्यो, ६० कम्पनीको मूल्य घट्यो भने २ कम्पनीको मूल्य स्थिर रह्यो । कुल ७१ हजार २८७ पटकको सेयर किनबेचबाट १ करोड ६२ लाख ५ हजार ५५८ कित्ता सेयर किनबेच भएको नेप्सेको तथ्यांक छ ।

आइतबारको तुलनामा सोमबार कारोबार रकम घटेको छ । आइतबार ८ अर्ब ५० करोड ९२ लाख २१ हजार रुपैयाँ कारोबार भएकामा सोमबार ७ अर्ब ३५ करोड ८८ लाख रुपैयाँको सेयर कारोबार भएको छ । सोमबार होटल तथा पर्यटन उपसमूहबाहेक सबै उपसमूहका परिसूचक बढे । सो दिन होटल तथा पर्यटन उपसमूह ८६.८५ बिन्दुमा बन्द भएको छ । निर्जीवन बिमा १३७.२९, विकास बैंक ९९.०९, जिवन बिमा ५४.७९, व्यापार २४.६६ अंकले बढेको छ ।