काठमाडौँ — गत साता सेयर बजारको आकार (कुल बजार पुँजीकरण) करिब पौने ८३ अर्ब रुपैयाँले खुम्चिएको छ । सातामा सबै कारोबार दिन नेप्से घटेपछि कुल बजार पुँजीकरणमा पनि कमी आएको छ । यसैलाई सेयर बजारको आकार घटेको रूपमा विश्लेषण गरिएको हो ।

गत साता चार दिन सेयर कारोबार भएकोमा सबै दिन नेप्से घट्यो । नेप्से घटेसँगै सो अवधिमा कुल बजार पुँजीकरण ८२ अर्ब ८३ करोड १४ लाख रुपैयाँले घटेको छ  । अघिल्लो बिहीबार ४४ खर्ब २७ अर्ब ५३ करोड रुपैयाँ रहेको कुल बजार पुँजीकरण गत बिहीबार ४३ खर्ब ४४ अर्ब ७० करोड रुपैयाँ कायम भएको छ । यसले सो अवधिमा नेप्से करिब पौने ८३ अर्बले खुम्चिएको देखाउँछ । कुल सूचीकृत सेयरलाई सोही दिनको सेयर मूल्यले गुणा गरेर कुल बजार पुँजीकरण गणना गरिन्छ । पुँजीकरण घट्नुको अर्थ सूचीकृत सेयरको बजार मूल्यमा कमी आउनु हो । यही आधारमा पुँजीकरण घट्दा लगानीकर्ताको सम्पत्तिको मूल्य घटेको रूपमा विश्लेषण गरिन्छ ।

गत साता सेयर कारोबार मापक नेप्से परिसूचक ४९.७९ अंकले घटेको छ । साताको चार कारोबार दिन नेप्से घट्दा २ हजार ६ सय ११.८५ बिन्दुमा ओर्लिएको नेप्से अघिल्लो साताको अन्तिम कारोबारका दिन २ हजार ६ सय ६१.६४ बिन्दुमा बन्द भएको थियो । 

गत साता ४ दिन मात्रै सेयर कारोबार भयो । यसअनुसार आइतबार १२.५३, मंगलबार १४.८७ , बुधबार १३.९६ र बिहीबार ८.४१ अंकले नेप्से घट्यो । गत साता ३५ अर्ब ६५ करोड ७४ लाख ३२ हजार रुपैयाँको सेयर कारोबार भएको छ । अन्य साता जस्तै गत साता पनि नेप्से कारोबारमा जलविद्युत्कै वर्चस्व रह्यो । साताभर जलविद्युत्को मात्रै १९ अर्ब ११ करोड ८५ लाख ९६ हजार रुपैयाँको कारोबार भयो । जबकि बैंक, बिमा र वित्तीय संस्थाको ९ अर्ब ३४ करोड ९३ लाख ८७ हजार रुपैयाँको कारोबार भएको नेप्सेले जनाइएको छ ।