काठमाडौँ — सेयर कारोबारको गिरावटले बुधबार पनि निरन्तरता पाएको छ । यस दिन नेप्से परिसूचक १३.९६ अंकले घटेको छ । शून्य दशमलव ५३ प्रतिशतले घटेर नेप्से २ हजार ६ सय २० दशमलव २७ बिन्दुमा ओर्लिएको छ ।

 निरन्तर चार कारोबार दिनयता नेप्से घटिरहेको छ । नेप्से गत बिहीबार १२.०४, आइतबार १२.५३ र मंगलबार १४.८७ अंकले घटेको थियो ।

बुधबार कुल ६२ कम्पनीको सेयर मूल्य बढ्यो भने १८३ कम्पनीको घट्यो, एक कम्पनीको मूल्य स्थिर रह्यो । कुल १ लाख १२ हजार ५ सय ७७ पटकको सेयर किनबेचबाट ८ अर्ब ७३ करोड ६५ लाख रुपैयाँको सेयर कारोबार भएको छ । बुधबार कारोबार रकम पनि घटेको छ । मंगलबार भने ९ अर्ब ६३ करोड रुपैयाँको सेयर कारोबार भएको थियो ।

बुधबार कुल १ करोड ८४ लाख ९६ हजार १३८ कित्ता सेयर किनबेच भयो । कुल १३ उपसमूहमध्ये विकास बैंक र अन्य उपसमूहबाहेक सबै उपसमूह घटे । विकास बैंक ६५.०५ र अन्य ५५.१२ अंकले बढेको छ ।

घट्ने उपसमूहहरूमा नै जीवन बिमा, होटल तथा पर्यटन, निर्जीवन बिमा, उत्पादन तथा प्रशोधनलगायत रहे । जीवन बिमा ११६.८४, होटल तथा पर्यटन १०३.३९, निर्जीवन बिमा १७४.८३, उत्पादन तथा प्रशोधन ६६.८८ र जलविद्युत् ६९.५१ अंकले घटेको छ ।