काठमाडौँ — महालेखा परीक्षकको कार्यालयले वैदेशिक रोजगार कल्याणकारी कोष ऐनविपरीत सवारीसाधन खरिद, भ्रमण खर्च, मेला तथा नियोगहरूमा कर्मचारी नियुक्त गरी ४ करोड १२ लाख ९ हजार रुपैयाँ खर्च गरेको जनाएको छ । यो कोष श्रमिक र म्यानपावर व्यवसायीको रकम जम्मा हुन्छ ।

आर्थिक वर्ष २०८०/८१ को महालेखा परीक्षकको प्रतिवेदनअनुसार नियमावलीमा व्यवस्था गरेको शीर्षक बाहिर गई खर्च गरेको प्रतिवेदनमा औंल्याइएको छ । 

प्रतिवेदनअनुसार कोषको रकमबाट नेपाली राजदूतावास अबुधाबीलाई वैदेशिक रोजगार मेला व्यवस्थापन र वैदेशिक रोजगार व्यवसायी तथा संघ संगठनका प्रतिनिधिहरूको भ्रमण खर्चसमेतका लागि ३३ लाख १६ हजार, रोजगार मेलामा सहभागी पदाधिकारी / कर्मचारीको भ्रमण खर्चमा १८ लाख २७ हजार, दुई थान विद्युतीय कार खरिद गर्न ७९ लाख ४० हजार, तीन दूतावासका सवारीसाधन मर्मतमा २३ लाख ९८ हजार तथा नियोगमा कर्मचारी नियुक्त गरी २ करोड ५७ लाख २८ हजार रुपैयाँ खर्च गरेको छ  । यसलाई ऐनविपरीत खर्च गरेको भनिएको छ ।

त्यस्तै वैदेशिक रोजगार व्यवसाय कोषबाट नियमावलीविपरीत गई साधन खरिदमा ५२ लाख ९९ हजार, मन्त्रालयको विविध खर्चमा १२ लाख १३ हजार र ७ कर्मचारीको वैदेशिक भ्रमणमा २२ लाख ८८ हजार खर्च गरेको प्रतिवेदनमा उल्लेख छ । यो कोष म्यानपावर कम्पनीको धरौटी रकमको नब्बे प्रतिशत मुद्दती खातामा लगानी गरी प्राप्त हुने ब्याजको २५ प्रतिशत रकम जम्मा हुन्छ । जुन वैदेशिक रोजगार विभागले वैदेशिक रोजगार व्यवसाय कोषमा जम्मा गरिरहेको छ ।