काठमाडौँ — सेयर कारोबार मापक नेप्से परिसूचक बुधबार ६२.२५ अंकले बढेको छ । अघिल्लो दिनको तुलनामा २.३८ प्रतिशतले बढेपछि समग्र नेप्से २ हजार ६ सय ७३.६९ विन्दुमा उक्लेर बन्द भएको छ । अघिल्ला ६ करोबार दिन लगातार घटेको नेप्सेमा बुधबार उच्च अंकको वृद्धि भएको हो ।

लगातार नेप्से ओरालो लाग्दा लगानीकर्ता निरुत्साहित भएका थिए । बुधबार नेप्से उच्च अंकले बढ्दा लगानीकर्ता उत्साहित भएको सेयर ब्रोकरहरूले जनाएका छन् । 

अघिल्ला ६ कारोबार दिन लगातार घटेको नेप्से धेरै तल झरिसकेको र घटेको बजारमा लगानीकर्ताले खरिद चाप बढाएपछि समग्र नेप्सेको वृद्धिमा टेवा पुगेको हो । साप्ताहिक रूपमा विश्लेषण गर्दा निकै कम दिन मात्र नेप्से बढ्ने गरेको छ भने धरैजसो दिन घट्ने गरेको छ । नेप्से घट्दा धेरैले घट्ने र बढ्दा थोरैले मात्र बढ्ने गरेकाले औसतमा नेप्से घट्दै आएको छ ।

बजारमा ६ खर्ब बढी ऋण दिन मिल्ने रकम थुप्रिएको, ब्याजदर एकल अंकमा झरेको, घरजग्गालगायत लगानीका अन्य क्षेत्र अपेक्षित रूपमा सुधार हुन नसकेको लगायत कारण बैंक तथा वित्तीय संस्थाले सेयर कर्जालाई प्राथमिकतामा राखेका छन्, जसअनुसार सेयर कर्जा बढेको पनि छ । तर त्यसको सकारात्मक असर सेयर बजारमा पर्न नसकेको जानकार बताउँछन् ।