अघिल्लो बिहीबार ४४ खर्ब १९ अर्ब ७० करोड ६९ लाख रुपैयाँ रहेको कुल बजार पुँजीकरण गत बुधबार ४३ खर्ब ६२ अर्ब ८५ करोड ७८ लाख रुपैयाँ कायम
काठमाडौँ — सेयर कारोबार मापक नेप्से परिसूचक गत साता ३४.१९ अंकले घट्यो । सो अवधिमा धितोपत्र (सेयर) बजारको आकार कुल बजार पुँजीकरण भने पौने ५७ अर्ब रुपैयाँले खुम्चिएको छ । गत बुधबार बजार बन्द हुँदा कुल बजार पुँजीकरण ४३ खर्ब ६२ अर्ब ८५ करोड ७८ लाख रुपैयाँ कायम भएको छ ।
अघिल्लो बिहीबारको तुलनामा यो ५६ अर्ब ८४ करोड रुपैयाँ कम हो । अघिल्लो बिहीबार कारोबार बन्द हुँदा कुल बजार पुँजीकरण ४४ खर्ब १९ अर्ब ७० करोड ६९ लाख रुपैयाँ थियो । दोस्रो बजारमा सूचीकृत कुल सेयर संख्यालाई सोही दिनको बजार मूल्यले गुणा गरेर कुल बजार पुँजीकरण गणना गरिन्छ । यसकारण कुल बजार पुँजीकरणले एक निश्चित समयमा सेयर बजारको आकार कति छ भन्ने देखाउँछ । समग्रमा सूचीकृत कम्पनी सेयर मूल्य बढ्दा कुल बजार पुँजीकरण पनि बढ्छ भने घट्दा घट्छ । गत साता चार दिन मात्रै कारोबार भएको थियो । गत बिहीबार मजदुर दिवसका अवसरमा सार्वजनिक बिदा भएकाले सेयर कारोबार भएन ।
गत साताको चार कारोबार दिनमा कुल ९ करोड ५२ लाख ६० हजार ७०१ कित्ता सेयर किनबेच हुँदा ३६ अर्ब ७३ करोड ८१ लाख ६३ हजार रुपैयाँको सेयर कारोबार भएको छ । नेप्से परिसूचक घट्दा कारोबार रकम घट्यो । अघिल्लो साताजस्तै गत साता पनि सेयर कारोबारमा जलविद्युत्कै वचस्व रह्यो । वित्तीय संस्था तथा बिमाभन्दा जलविद्युत् समूहको १३ अर्ब ३७ करोड ६४ लाख रुपैयाँले बढी कारोबार भएको नेप्सेले जनाएको छ ।
गत साता जलविद्युत् उपसमूहको मात्रै २० अर्ब ४३ करोड ९५ लाख २२ हजार रुपैयाँको सेयर कारोबार भएको छ । बैंकिङ, डिबेन्चर, विकास बैंक, फाइनान्स, जीवन बिमा, लघुवित्त र निर्जीवन बिमा (वित्तीय संस्था तथा बिमा) उपसमूहको कुल ७ अर्ब ६ करोड ३० लाख ७९ हजार रुपैयाँको कारोबार भएको छ । अघिल्लो साता जलविद्युत्को २० अर्ब १ करोड ४४ लाख रुपैयाँको कारोबार भएको थियो । उक्त साता बैंक तथा वित्तीय संस्था र बिमाको ८ अर्ब ५० करोड ४० लाख रुपैयाँको सेयर खरिदबिक्री भएको थियो ।
गत साता समग्र नेप्से घटेसँगै अधिकांश उपसमूहको परिसूचक पनि घट्यो । गत साता जलविद्युत्, व्यापार र म्युचअल फन्डको परिसूचक मात्रै बढ्यो । गत साता जलविद्युत् २५.१४ अंकले बढेको छ । अघिल्लो साताको बिहीबार जलविद्युत् उपसमूह ३४८१.७७ विन्दुमा बन्द भएको थियो । गत साताको बुधबार जलविद्युत् उपसमूहको परिसूचक ३५०६.९१ विन्दुमा बन्द भएको हो । जलविद्युत् जस्तै व्यापार ६७ अंक र म्युचअल फन्ड शून्य दशमलव शून्य २ प्रतिशतले बढेको नेप्सेको तथ्यांक छ ।
गत साता बैंकिङ, होटल तथा पर्यटन, उत्पादन तथा प्रशोधनलगायत उपसमूहका परसूचक घटे । सो अवधिमा बैंकिङ उपसमूहको परिसूचक ३०.७५ अंकले घटेको छ । अघिल्लो बिहीबार १३३४.९६ विन्दुमा बन्द भएको बैंकिङ उपसमूहको परिसूचक गत बुधबार १३०४.२१ विन्दुमा ओर्लेर बन्द भएको छ ।
अवधिमा होटल तथा पर्यटन उपसमूहको परिसूचक ६३.५६, अन्यको ६३.७५, विकास बैंकको १२२.०६, उत्पादन तथा प्रशोधनको ८६.३५, निर्जीवन बिमाको १०७.८९, फाइनान्सको ५२.०६, लुघवित्तको ११४.९३, जीवन बिमाको ११५.०५ र लगानी उपसमूहको १.५७ अंकले घटेको नेप्सेले जनाएको छ ।
