काठमाडौँ — सेयर कारोबार मापक नेप्से परिसूचक लगातार दोस्रो कारोबार दिन (सोमार र मंगलबार) पनि दोहोरो अंकले घटेको छ । सोमबार १४.५३ अंकले घटेको नेप्से मंगलबार १५.०८ अंकले घटेको हो । अघिल्लो दिनको तुलनामा ०.५७ प्रतिशतले घटेपछि मंगलबार समग्र नेप्से २ हजार ६ सय ३१.९८ बिन्दुमा ओर्लेको छ । 

सो दिन कारोबारमा आएकामध्ये ५७ कम्पनीको सेयर मूल्य बढ्यो भने १८८ वटाको घट्यो । मंगलबार कुल ६६ हजार २ सय ६५ पटकको सेयर कारोबारमा १ करोड ८४ लाख ९१ हजार ९ सय ४१ कित्ता सेयर किनबेच भए । नेप्से परिसूचकसँगै कारोबार रकम पनि निरन्तर घट्न थालेको छ ।

सोमबार सेयर बजारमा ८ अर्ब ९१ करोड २८ लाख रुपैयाँको सेयर किनबेच हुँदा मंगलबार ७ अर्ब ५७ करोड ५२ लाख ६ हजार रुपैयाँ बराबरको सेयर कारोबार भएको छ । 

सो दिन कारोबारमा आएका १३ उपसमूहमध्ये सामूहिक लगानी कोषमा झिनो सुधार देखिए पनि बाँकी सबैको परिसूचक उच्च अंकले घट्यो । १२ वटै उपसमूहको परिसूचक उच्च अंकले घट्दा समग्र नेप्सेमा दोहोरो अंकको गिरावट आएको हो । सो दिन सबैभन्दा बढी जीवन बिमा उपसमूहको परिसूचक ७०.९३ अंकले घटेको छ । विकास बैंकको ४८.६५, होटल तथा पर्यटनको ४०.७४, निर्जीवन बिमाको ३९.९७ र लघुवित्तको ३६.४३ अंकले घटेको नेप्सेको तथ्यांक छ । 

नेप्से परिसूचक घट्दा धितोपत्र (सेयर) बजारको आकार (कुल बजार पुँजीकरण) भने एकै दिन २५ अर्ब रुपैयाँले खुम्चिएको छ । मंगलबार कारोबार बन्द हुँदा कुल बजार पुँजीकरण ४३ खर्ब ७६ अर्ब ३९ करोड ७५ लाख रुपैयाँ कायम भएको छ ।