काठमाडौँ — सेयर कारोबार मापक नेप्से परिसूचक सोमबार करिब साढे १४ अंकले घट्दा धितोपत्र (सेयर) बजारको आकार (कुल बजार पुँजीकरण) भने २४ अर्बले खुम्चिएको छ । सोमबार कारोबार बन्द हुँदा कुल बजार पुँजीकरण ४४ खर्ब १ अर्ब ४८ करोड ८२ लाख रुपैयाँ कायम भएको छ । 

आइतबार कारोबार बन्द हुँदा यस्तो पुँजीकरण ४४ खर्ब २५ अर्ब ६५ करोड ९७ लाख रुपैयाँ थियो । यसले सोमबार मात्रै कुल बजार पुँजीकरण करिब २४ अर्ब १७ करोड रुपैयाँले खुम्चिएको देखिन्छ । दोस्रो बजारमा सूचीकृत कुल सेयर संख्यालाई सोही दिनको बजार मूल्यले गुणा गरेर कुल बजार पुँजीकरण गणना गरिन्छ ।

सोमबार कारोबारमा आएका कुल कम्पनीमध्ये ७८ वटाको मात्र सेयर मूल्य बढेको छ भने १६७ वटाको घटेको छ । सेयर मूल्य बढ्नेभन्दा घट्ने कम्पनी धेरै र गिरावटको दर पनि बढिरहेकाले एकै दिन कुल बजार पुँजीकरणमा २४ अर्ब १७ करोड रुपैयाँले कमी आएको हो । 

सोमबार नेप्से परिसूचक १४.५३ अंकले घटेको छ । अघिल्लो दिनको तुलनामा ०.५४ प्रतिशतले घटेर समग्र नेप्से २ हजार ६ सय ४७.०७ बिन्दुमा ओर्लेको हो । गत बिहीबार पनि सामान्य अंकले बढेको नेप्से आइतबार साढे ३ अंकले बढेर बन्द भएको थियो । तर, नेप्सेको वृद्धि सोमबारसम्म पनि टिकेन । 

मुलुकमा राजनीतिक स्थिरता नदेखिएको, सरकार कति दिन टिक्छ भन्ने अन्योल बढ्दै गएकाले लगानीकर्तामा आत्मविश्वास बढ्न नसकेको एक धितोपत्र ब्रोकरले बताए । लगानीका लागि चाहिने मुख्य कुरा आत्मविश्वास हो र अहिले त्यसकै खडेरी रहेकाले लगानीकर्ताले थप लगानी विस्तार गर्न नसकेको ती अधिकारीले बताए ।

सोमबार कुल ७६ हजार ९ सय ९८ पटकको सेयर कारोबारमा २ करोड ३६ लाख ८९ हजार ७१ कित्ता सेयर किनबेच भए । सो दिन नेप्से परिसूचकसँगै कारोबार रकम पनि घटेको हो । ती सेयर खरिदबिक्रीबाट ८ अर्ब ९१ करोड २८ लाख रुपैयाँ बराबरको कारोबार भएको छ । आइतबार १० अर्ब ८७ करोड ५९ लाख रुपैयाँ बराबरको सेयर कारोबार भएको थियो ।

कुल १३ उपसमूहमध्ये वित्त कम्पनी र व्यापारबाहेक सबैको परिसूचक घटेपछि समग्र नेप्सेमा दोहोरो अंकको गिरावट आएको हो । सो दिन वित्त कम्पनीे ३४ र व्यापार १९.२४ अंकले बढेको । घट्ने उपसमूहमा उत्पादन तथा प्रशोधन, लघुवित्त, जलविद्युत्, सामूहिक लगानी कोष, जीवन बिमा, निर्जीवन बिमालगायत रहे ।

उत्पादन तथा प्रशोधन ३९.०८, लघुवित्त ३५.७८, जलविद्युत् २६.५३, जीवन बिमा १८.३५ र निर्जीवन बिमा ३.४४ अंकले घटेको नेप्सेले जनाएको छ । सोमबार नेपाल माइक्रो इन्स्योरेन्स कम्पनीको सेयर मूल्य १० प्रतिशतले बढेदा सर्किट ब्रेकरमार्फत कारोबार नियन्त्रण गर्नुपरेको थियो । सो दिन क्रेस्ट माइक्रो लाइफ इन्स्योरेन्सको ९.९९, मध्य भोटेकोशी जलविद्युत्को ७.६२, ग्रिन डेभलपमेन्टको ६.९७ र एनआईएमबी डेबेञ्चर २०९० को ५.९१ प्रतिशतले सेयर मूल्य बढे । तर, सप्तकोशी विकास बैंकको सेयर मूल्य ८.४५, युनिभर्सल पावर कम्पनीको ४.८०, त्रिशूली जलविद्युत् कम्पनीको ४.७९, मन्दाकिनी हाइड्रोपावरको ४.३३ र श्वेतगंगा हाइड्रोपावर एन्ड कस्ट्रक्सनको ४.२५ प्रतिशतले घटे ।