काठमाडौँ — सेयर कारोबार मापक नेप्से परिसूचक ५८.०५ अंकले घटेको छ । अघिल्लो दिनको तुलनामा दुई दशमलव १९ प्रतिशतले घटेर नेप्से २ हजार ५ सय ८२.७३ बिन्दुमा ओर्लिएको छ ।

 पछिल्लो ६ कारोबार दिनपछि सोमबार नेप्से २६.१० अंकले बढेर बन्द भएको थियो । तर त्यो वृद्धि मंगलबारसम्म पनि टिकेन । परिणाम मंगलबार नेप्से करिब ५८ अंकले घट्यो ।

राजनीतिक अस्थिरता, सरकारले प्रभावकारी रूपमा काम गर्न नसक्नु, राजावादीहरूको चहलपहल बढ्नु, बैंकिङविरुद्ध अराजक गतिविधि बढ्नु, माओवादीलगायत राजनीतिक दलहरूको प्रदर्शनीलगायत कारण लगानीकर्ता थप लगानी नगरेर पर्ख र हेरको अवस्थामा रहेको जानकार बताउँछन् । सडकमा देखिएका यस्ता गतिविधिले खासगरी ठूला लगानीकर्ताले लगानी विस्तारको हिम्मत गर्न नसक्दा बजारले उकालो बाटो समात्न नसकेको उनीहरूको भनाइ छ ।