काठमाडौँ — सेयर कारोबार मापक नेप्से परिसूचक आइतबार ५४.६२ अंकले घटेर २ हजार ६ सय १४.६८ बिन्दुमा ओर्लेको छ । गत बिहीबारको तुलनामा यो २.०४ प्रतिशतले घटेसँगै नेप्से दुई महिनायताकै न्यून बिन्दुमा ओर्लेको छ । गत साता सबै कारोबार दिन लगातार घटेको नेप्से यो साताको पहिलो कारोबार दिन पनि साढे ५४ अंकले घटेको हो । 

आइतबारको नेप्से गत माघ ८ यताकै तुलनामा न्यून हो । गत माघ ८ मा नेप्से २६१३.०८ बिन्दुमा बन्द थियो । त्यसयता नेप्से फागुन १८ मा २८९०.२८ बिन्दुमा पुगेको थियो । त्यसपछि नेप्से क्रमशः घट्दै गएको छ । गत साताभर नेप्से परिसूचक ६७.१७ अंकले घटेको थियो । 

कुल १३ कम्पनीको सेयर मूल्य आइतबार बढ्यो भने २ सय ३० कम्पनीको मूल्य घट्यो । कुल ७२ हजार २ सय ६५ पटकको सेयर किनबेचबाट ६ अर्ब ३२ करोड १ लाख ४१ हजार रुपैयाँको सेयर कारोबार भएको छ । आइतबार १ करोड २३ लाख ७१ हजार २ सय ८० कित्ता सेयर किनबेच भयो ।