काठमाडौँ — सहरी विकास मन्त्रालयले चालु आर्थिक वर्षको आठ महिनामा ११ अर्ब १२ करोड ४० लाख रुपैयाँ मात्रै पुँजीगत खर्च गरेको छ । मन्त्रालयले पत्रकार सम्मेलन गर्दै साउनदेखि फागुनसम्म १७.४३ प्रतिशत पुँजीगत खर्च गरेको जानकारी दिएको हो ।

मन्त्रालयको पुँजीगत खर्चका लागि ६३ अर्ब ८३ करोड ४५ लाख रुपैयाँ विनियोजन गरेको थियो । चालु आर्थिक वर्षका लागि ४ अर्ब ४२ करोड ३८ लाख रुपैयाँ चालु खर्चका लागि विनियोजन गरेकामा १ अर्ब ११ करोड ६३ लाख रुपैयाँ खर्चेको जनाएको छ । 

चालू आर्थिक वर्षका लागि ३ हजार ७  सय १६ वटा नयाँ कार्यक्रम राखिएको मन्त्रालयले जनाएको छ । नयाँ कार्यक्रममध्ये १ हजार  ६ सय २३ वटा कार्यक्रमको बोलपत्र आह्वानमध्ये १ हजार ९८ वटा कार्यक्रमहरूको ठेक्का सम्झौता भएको छ । त्यसमध्ये १२४ वटा कार्यक्रमहरूको निर्माण कार्य सम्पन्न भएको मन्त्रालयले जनाएको छ ।