काठमाडौँ — सरकारी स्वामित्वको विद्युत् उत्पादन कम्पनी लिमिटेड (भीयूसीएल) को सहायक कम्पनी जगदुल्ला हाइड्रोपावर लिमिटेडले पुनः आहृवान गरेको ठेक्कामा ४ कम्पनीले आवेदन दिएका छन् । सरकारले नै डोल्पामा बनाउन लागेको १०६ मेगावाटको जगदुल्ला जलविद्युत् आयोजनाको ठेक्का गत माघ ६ मा पुनः ठेक्का आहृवान गरेको थियो ।

जगदुल्लाको सिभिल र हाइड्रोमेकानिकलतर्फको १६ अर्ब रुपैयाँको आयोजनामा सिनो हाइड्रो, सिल/एचएचएच जेभी, जेसीई/एनके जेभी र टु एमजी/फेवा जेभीले आवेदन दिएका हुन् । आवेदन दिएका कम्पनीहरुको प्राविधिक मूल्यांकन गरेपछि आर्थिक प्रस्ताव खोलिने जगदुल्लाका प्रमुख कार्यकारी अधिकृत सञ्जय सापकोटाले बताए ।

‘प्राविधिक मूल्यांकन समिति छुट्टै छ, मूल्यांकनका लागि १५ दिन जति लाग्छ होला,’ उनले भने, ‘त्यसपछि आर्थिक प्रस्ताव खोलिन्छ ।’ प्राविधक र आर्थिक मूल्यांकनपछि मात्रै कम्पनी छनोट गरिने उनले जनाए । 

कम्पनीले गत जेठ २० मा सिभिल र हाइड्रोमेकानिकलतर्फको ठेक्का आहृवान गरेको थियो । उक्त ठेक्काका लागि हाई हिमालयन हाइड्रो र एजीई कम्पनीको जेभी, झोङदिङ इन्टरनेसनल, पटेल इन्जिनियरिङ, लामा कन्स्ट्रक्सनलगायत सात कम्पनीले आवेदन दिएका थिए । तर प्राविधिक प्रस्तावमा कुनै पनि कम्पनी पास नभएपछि पुस २२ मा ठेक्का रद्द गरिएको जगदुल्ला कम्पनीको दाबी थियो । 

कम्पनीले आहृवान गरेको सूचनामा पछिल्ला १० वर्षमा कम्तीमा ३ वर्ष ३ करोड ४० लाख डलरको कारोबार गरेको हुनुपर्ने उल्लेख छ  । इन्जिनियरिङ, प्रोक्योरमेन्ट र कन्स्ट्रक्सन (ईपीसी)/प्लान्ट एउटा डिजाइनमा कम्तीमा एउटा ठेक्कामा ४ करोड डलरभन्दा बढीको काम गरेको अनुभव हुनुपर्ने सूचनामा भनिएको छ । यसअघि ठेक्का आहृवान गर्दा पछिल्ला १० वर्षमा कम्तीमा ३ वर्षमा ३ करोड ५० लाख डलरको कारोबार गरेको हुनुपर्ने उल्लेख थियो । इन्जिनियरिङ, प्रोक्योरमेन्ट र कन्स्ट्रक्सन (ईपीसी)/प्लान्ट एउटा डिजाइनमा कम्तीमा एउटा ठेक्का ४ करोड १० लाख डलरभन्दा बढीको काम गरेको अनुभव हुनुपर्ने व्यवस्था गरिएको थियो ।