गोरखा — ठेक्काको सम्झौता अवधि सकिन सात महिना बाँकी छँदै पालुङटार नगरपालिका–९ स्थित खारखोलामा मोटरेबल पुल निर्माण सकिएको छ । २०८० चैत २७ मा १८ महिनाभित्र सक्ने गरी श्रीगणेश अमृत देवी निर्माण सेवा जेभीले पुल निर्माणको जिम्मा पाएको थियो । ढुंगेटारीस्थित खारखोलाको उक्त मोटरेबल पुल निर्माणको काम ११ महिनामा सकिएको हो ।

खारखोला पुलको निर्माण सकिएको पूर्वाधार विकास कार्यालयका प्राविधिक मोहन श्रेष्ठले बताए । ‘१८ महिना समय थियो, ११ महिनामै काम सकियो,’ उनले भने, ‘काम सकिए पनि ठेकेदारले पूरै भुक्तानी पाएका छैनन्, रकमान्तर गरेर भुक्तानी प्रक्रिया चलिरहेको छ ।’ 

सम्झौताअनुसार उक्त पुल निर्माणको म्याद २०८२ असोज २६ सम्म छ । पुलको भौतिक प्रगति पूरा भएको र वित्तीय प्रगति भने ८० प्रतिशत रहेको श्रेष्ठले सुनाए । ‘गत वैशाखबाट काम सुरु हुँदा नै यो पुलको प्रगति राम्रो थियो, निर्माण सामग्री ल्याउन पनि सहज नै ठाउँ छ, अरू समस्या पनि नआएपछि लगातार काम भयो,’ उनले भने । २ करोड ७५ लाख लागतमा २५ मिटर लम्बाइको आरसीसी मोटरेबल पुल निर्माण भएको हो ।