भैरहवा — मुलुकको दोस्रो ठूलो भन्सारका रुपमा रहेको भैरहवा भन्सार कार्यालयले चालु आवको सात महिनामा ५३ अर्ब १७ करोड रुपैयाँ राजस्व संकलन गरेको छ ।

राजस्व संकलनका दृष्टिले भैरहवा भन्सार कार्यालय वीरगन्जपछिको दोस्रो ठूलो भन्सार मानिन्छ । गत साउनदेखि माघसम्मको यो भन्सार राजस्व असुली गत वर्षको सोही अवधिको तुलनामा १६ दशमलव ७७ प्रतिशतले धेरै हो ।

भैरहवा भन्सार कार्यालयका प्रमुख रामप्रसाद रेग्मीले चालु वर्षको सात महिनामा वार्षिक लक्ष्यको ४८ दशमलव ६४ प्रतिशत राजस्व असुली भएको र मासिक लक्ष्य पनि औसतमा ८५ प्रतिशतमाथि रहेको बताए ।

गत आवको यस अवधिमा कार्यालयले ४५ अर्ब ५४ करोड राजस्व संकलन गरेको थियो । चालु आवमा १ खर्ब ९ अर्ब ३३ करोड रुपैया राजस्व संकलन गर्ने लक्ष्य छ । चालु आवको सात महिनामा सबैभन्दा बढी मोटरसाइकल आयातबाट १० अर्ब ५ करोड भन्सार राजस्व असुली भएको प्रमुख रेग्मीले बताए ।