अर्थ मन्त्रालयको अभिलेखमा मस्कको विभागलाई पहुँच नदिन न्युयोर्क संघीय अदालतले दियो अन्तरिम आदेश
काठमाडौँ — अर्बपति इलन मस्कले नेतृत्व गरेको ट्रम्प प्रशासनको ‘डज’ भनिने सरकारी दक्षता विभागलाई संघीय भुक्तानी प्रणालीमा पहुँच प्रतिबन्धको माग गर्दै झण्डै दुई दर्जन अमेरिकी राज्य सरकारहरूले अदालतमा मुद्दा दायर गरेका छन् । मस्क र उनका सहयोगीहरूलाई अमेरिकाको अर्थ मन्त्रालयका डिजिटल प्रणालीमा पहुँच प्राप्त गर्ने कुनै अधिकार नभएको भन्दै हालसम्म १९ राज्यहरूले अदालतमा मुद्दा दर्ता गरेका हुन् ।
रोयटर्सका अनुसार डेमोक्रेटिक नेतृत्वका अमेरिकी राज्यहरूले खर्बौँ डलरको भुक्तानी गर्ने अर्थ मन्त्रालयअन्तर्गतका निकायमा मस्कको पहुँच कानुनसम्मत नभएको दाबी गरेका छन् । न्युयोर्क महान्यायाधिवक्ताको कार्यालयको अगुवाइमा म्यानह्याटन संघीय अदालतमा मुद्दा दर्ता गरिएको छ ।
न्यायाधिवक्ता लेटिसिया जेम्सले यसमा अग्रसरता लिएकी छन् । एरिजोना, क्यालिफोर्निया, कोलोराडो, कनेक्टिकट, डेलावेर, हवाइ, इलिनोइज, मेन, मेरिल्यान्ड, म्यासाचुसेट्स, मिनेसोट्टा, नेभाडा, न्युजर्सी, नर्थ क्यारोलाइना, ओरिगन, रोड आइल्यान्ड, भर्मन्ट र विस्कन्सिनमा पनि मुद्दा दायर गरिएका छन् ।
दायर मुद्दामा मस्क र उनको समूहले स्वास्थ विमा, शिशु विद्यालय, जलवायूसम्बन्धी पहल, कर फिर्ता र अन्य कार्यक्रमहरूमा संघीय लगानी प्रभावित गर्न सक्ने उल्लेख छ । अमेरिकी निकायहरूका प्रणालीमा रहेका लाखौँ नागरिकको विवरण रिपब्लिकन राष्ट्रपति डोनाल्ड ट्रम्पले आफ्ना राजनीतिक एजेन्डमा लगाउन सक्ने पनि निवेदनमा भनिएको छ ।
अमेरिकी सरकारी प्रणालीहरूमा दक्षता विभागलाई पहुँच दिँदा त्यसले अधिक साइबर सुरक्षा जोखिम निम्त्याउन सक्ने र राज्य सरकार एवं नागरिकको ठूलो लगानी गुम्न सक्ने निवेदनमा उल्लेख छ । डजलाई पहुँच दिँदा लाखौँ अमेरिकी नागरिकको अतिवैयक्तिक सूचना सार्वजनिक हुनसक्ने खतरासमेत रहने जिकिर गरिएको छ ।
‘मस्क र उनको दक्षता विभागलाई अमेरिकी नागरिकको निजी विवरण र देशका केही संवेदनशिल डेटामा पहुँच प्राप्त गर्ने कुनै अधिकार छैन,’ न्युयोर्ककी न्यायाधिवक्ता जेम्सले भनेकी छन्, ‘हाम्रा वैयक्तिक सूचना सुरक्षित राख्न म यो कदम चालिरहेकी छु ।’ अदालतमा दायर निवेदनमा राजनीतिक नियुक्ति पाएका, विशिष्ठ सरकारी कर्मचारी र अर्थ मन्त्रालयमा रहेका बाह्य एजेन्सीका कर्मचारीलाई भुक्तानीसम्बन्धी डेटामा पहुँच दिन नहुने माग गरिएको छ ।
विभागलाई अर्थ मन्त्रालयका अभिलेखहरूमा पहुँच प्राप्त गर्नबाट रोक लगाउँदै शनिबार मात्रै न्युयोर्कस्थित संघीय अदालतले अन्तरिम आदेश जारी गरेको छ । सामाजिक सुरक्षा र लाखौँ अमेरिकी नागरिकको बैँक खाताजस्ता वैयक्तीक विवरण समावेश हुने मन्त्रालयको प्रणालीमा मस्कलाई पहुँच नदिन संघीय जिल्ला न्यायाधिश पल ए एन्गलमेयरले अन्तरिम आदेश दिएका हुन् ।
न्युयोर्क सिटीको संघीय अदालतमा दायर मुद्दामा ट्रम्प प्रशासनले मस्कको टोलीलाई संघीय कानुनको उल्लंघन गर्दै अर्थ मन्त्रालयको केन्द्रीय भुक्तानी प्रणालीमा पहुँच दिएको आरोप लगाइएको छ । पूर्वराष्ट्रपति बाराक ओबामाले नियुक्त गरेका न्यायाधीश एन्गलमेयरले जसलाई संवेदनशील सूचनामा पहुँच निषेध गरिएको छ, तिनले मन्त्रालयका प्रणालीबाट डाउनलोड गरिएका सबै प्रतिलिपिहरू तुरुन्तै नष्ट गर्नुपर्ने निर्देशन दिएका छन् । उनले आगामी फेब्रुअरी १४ मा थप सुनुवाइ गर्न पेशी तोकेका छन् ।
अनावश्यक सरकारी खर्चमा कटौती र संघीय निकायहरूको पुन: संरचनाका लागि भन्दै राष्ट्रपति डोनाल्ड ट्रम्पले दक्षता विभाग स्थापना गरेका थिए । यसले अर्थ मन्त्रालयसँगै विभिन्न सरकारी निकायहरूको निरीक्षण गर्नुका साथै निकायहरूको डेटा सिस्टम नियन्त्रणमा लिएर कर्मचारी निष्कासनसमेत गर्न थालेपछि आलोचना सुरू भएको छ । आलोचकहरूले मस्कको बढ्दो शक्तिप्रति चिन्ता व्यक्त गरिरहँदा समर्थकहरूले फजुल सरकारी खर्च नियन्त्रणमा उनले सक्रियता देखाएको भन्दै तारिफ गरेका छन् ।
