चितवन — भरतपुरमा आज शुक्रबारबाट पहिलो राष्ट्रिय डेरी एक्स्पो (प्रदर्शनी) सुरु भएको छ । चितवन उद्योग संघको भरतपुर दूरसञ्चार रोडमा रहेको प्रदर्शनी केन्द्र (एक्स्पो सेन्टर) मा आयोजित उक्त प्रदर्शनीको कृषिमन्त्री रामनाथ अधिकारीले उद्घाटन गरे ।

चितवन उद्योग संघ र चितवन जिल्ला दुग्ध उत्पादक सहकारी संघले संयुक्त रूपमा आयोजना गरेको उक्त प्रदर्शनी माघ २७ गते तीन दिनसम्म चल्ने छ ।

किसान, उद्योगी र व्यवसायीलाई एकै थलोमा ल्याउने, डेरी उद्योगका नयाँ औजार र प्रविधिबारे जानकारी गराउने उद्देश्यले प्रदर्शनी आयोजना गरेको चितवन जिल्ला दुग्ध उत्पादक सहकारी संघका अध्यक्ष किशोर बगालेले बताए । समस्या र चुनौतीका बारेमा मन्थन गर्दै सम्भावनाको खोजी पनि गर्ने उनले बताए ।