काठमाडौँ — ९० मेगावाटको मर्स्याङ्दी नदी अर्धजलाशययुक्त जलविद्युत् आयोजनामा आंशिक लगानी जुटेको छ । कुमारी बैंकको नेतृत्वमा ३ वटा बैंक तथा वित्तीय संस्थाले १०.५० अर्ब रुपैयाँ लगानी गर्ने गरी सम्झौता भएको हो ।
आयोजनामा कुमारी बैंक लिमिटेड, प्रभु बैंक लिमिटेड, कृषि विकास बैंक लिमिटेड र सिदार्थ बैंक लिमिटेडको संयुक्त लगानी हुने गरी ऋण सम्भौता भएको हो । अन्य बैंक तथा वित्तीय संस्थाहरुले पनि लगानी गर्ने गरी छिट्टै सम्झौता हुने एम ए पावर प्रा लि का अध्यक्ष अनुप आचार्य बताए ।
आयोजना गोरखाको पालुङटार नगरपालिका, लमजुङको राइनास नगरपालिका र तनहुँको भानु नगरपालिका हुँदै बग्ने मर्स्याङ्दी नदीमा निर्माण हुने छ । आयोजना निर्माण अवधिको ब्याजसहित कुल २० अर्ब २५ करोड रुपैयाँ लागत अनुमान गरिएको छ ।
आयोजनामा ७५ प्रतिशत ऋण र २५ प्रतिशत स्वपुँजी लगानी हुने जनाइएको छ। प्रवर्द्वक कम्पनीका अनुसार ऋण लगानी तर्फ कुमारी बैंक लिमिटेडले ४ अर्ब, प्रभु बैक लिमिटेडले ३ अर्ब, सिद्दार्थ बैक लिमिटेडले २ अर्ब र कृषि विकास बैंक लिमिटेडले १.५ अर्ब रूपैयाँ लगानी गर्नेछन् ।
स्वपुँजीतर्फ अनुप आचार्य, हरिबाबु न्यौपाने र दीपक बरालको लगानी हुनेछ । यही समूहबाट २२ मेगावाटको सेतीखोला जलविद्युत् आयोजनाको निर्माण अन्तिम चरणमा पुगेको छ।
आयोजनाको नेपाल विद्युत् प्राधिकरणसँग ०८० कात्तिक १ मा विद्युत् खरिद बिक्री सम्झौता भएको थियो । २०८६ वैशाख २२ मा व्यावसायिक रूपमा विद्युत् उत्पादन गरिसक्नुपर्ने कम्पनीले जनाएको छ। आयोजनाको विस्तृत परियोजना प्रतिवेदन (डीपीआर), विस्तृत इजानियरिङ डिजाइन तथा ठेक्कासम्बन्धी कागजात तयारीको काम अन्तिम चरणमा रहेको छ ।
आयोजनाको वातावरणीय प्रभाव मूल्याकंन प्रतिवेदन स्वीकृतिका लागि वातावरण मन्त्रालयमा पेस भएको छ । आयोजनाबाट उत्पादित विद्युत् गृहदेखि २२० केभी सिंगल सर्किट प्रसारण लाइनमार्फत नेपाल विद्युत् प्राधिकरणको मार्किचोक सब-स्टेसनमा जोडिने छ।
