भोटखोला, संखुवासभा — भोटखोला गाउँपालिका–२ लिंगमका पेंङनुर्बु भोटेलाई खाँदबारीबाट घर पुग्न ३ दिन हिँड्न पर्थ्यो । सोमबार खाँदबारी–किमाथांकासम्म सडकको ट्र्याक खोल्ने काम सकिएको घोषणा हुँदा उनी निकै खुसी देखिन्थे । ‘भोटखोलावासीलाई सदरमुकाम खाँदबारीबाट घरसम्म पुग्न कम्तीमा ३ दिन हिँड्नै पर्थ्यो,’ उनले भने, ‘अब गाडी चढेर घरसम्म पुग्न सजिलो हुने भयो ।’ 

हटियाका पासाङनुर्वू भोटे पनि किमाथांकासम्म सडक पुगेपछि खुसी छन् । ६५ वर्षीय उनले खाँदबारीबाट गाडी चढेर घरसम्म पुग्ने सपना पूरा भएको खुसी हुँदै सुनाए । ‘अब किमाथांका नाकासम्म जान पाईने भयो,’ उनले भने, ‘गाडी नचल्दा भोटखोलावासीले महँगोमा सदरमुकाम खाँदबारीबाट खाद्यान्नलगायत सामग्री ल्याउनुपर्थ्यो ।’

यो सडकले चीन र भारत जोड्ने भएकाले बढी खुसी भएको उनले सुनाए । ‘अब तिब्बतबाट आएका खाद्यान्न र लत्ताकपडा सदरमुकाम हुँदै मधेससम्म लग्न सजिलो हुन्छ,’ उनले भने । 

राष्ट्रिय गौरवको आयोजना उत्तर–दक्षिण कोशी करिडोरअन्तर्गत ०६५/६६ देखि खाँदबारी–किमाथांका सडक निर्माण थालिएको थियो । १ सय ५८ किलोमिटर उक्त सडकको ट्र्याकको काम सकिएपछि ‘ब्रेक थ्रु’ भएको घोषणा गरिएको छ । भारतको जोगवनीदेखि संखुवासभाको किमाथांका हुँदै चीन जोड्ने कोशी राजमार्गअन्तर्गत यो सडकको ट्र्याक खोलिएको हो ।

जोगवनीदेखि खाँदबारी २ सय किमि सडकखण्ड कालोपत्र भइसकेको छ । खाँदबारी–किमाथांका सडकअन्तर्गत च्याम्ताङदेखि घोङघोप्पासम्मको १०.५१ किलोमिटर अप्ठ्यारो खण्डको भीरमा ट्र्याक खोल्न नेपाली सेनालाई जिम्मा दिइएको थियो । उक्त खण्डमा ट्र्याक खोल्ने काम सकिएको र अब सडकको स्तरोन्नति र चौडा बनाउने काम थालिने सडक विभागले जनाएको छ । 

यो सडक खण्डको भोटखोला–१ च्याम्ताङमा ऊर्जा, जलस्रोत तथा सिँचाइमन्त्री दीपक खड्का, रक्षामन्त्री मानवीर राई, भौतिक पूर्वाधार तथा यातायातमन्त्री देवेन्द्र दाहाल र पूर्व सांसद राजेन्द्रप्रसाद गौतमको उपस्थितिमा ‘ब्रेक थ्रु’ को घोषणा गरिएको हो । यसअघि खााँदबारीबाट च्याम्ताङसम्म १ सय ३४ किमि सडक निर्माण भइसकेको छ । किमाथांकाबाट घोङघोप्पासम्म १४ किमि सडकको कच्ची ट्र्याक खुलिसकेको छ । 

भोटखोला गाउँपालिकाका अध्यक्ष वाङछेदर भोटेले सडक निर्माणले भोटखोलाको आर्थिक विकासमा ठूलो सहयोग पुग्ने बताए । ‘भारतदेखि चीनसम्म जोड्ने कोशी राजमार्गको ट्र्याक खोल्ने काम सकिएको छ,’ उनले भने, ‘सडकको स्तरोन्नति र चौडा बनाउने काम पनि भइरहेको छ ।’ खाँदबारी–किमाथांका सडक जोडिएसँगै त्रिदेशीय पारवहनमा महत्त्वपूर्ण भूमिका निर्वाह गर्ने ऊर्जामन्त्री खड्काले बताए ।

‘त्रिदेशीय नाका जोड्ने सडक सञ्चालनमा आएपछि नेपाल–भारत र चीनका अलावा बंगलादेशले फाइदा लिन सक्नेछ,’ उनले भने, ‘सडकको स्तरोन्नतिका लागि आवश्यक बजेट विनियोजन गर्न भौतिक पूर्वाधार मन्त्रालयलाई आग्रह गरेका छौं ।’