काठमाडौँ — नेपालको बैंकिङ क्षेत्रका वास्तविक समस्या पहिचान गर्न नीति निर्माताहरूले सरोकारवालालाई आग्रह गरेका छन् । ब्याजदर धेरै तल झरिसक्दा पनि लामो समयदेखि कर्जा माग बढ्न नसकेको, खराब कर्जा बढिरहेको, नाफा घटेकोलगायत समस्याका कारण बैंक तथा वित्तीय संस्था दबाबमा रहेको बेला उपप्रधान एवं अर्थमन्त्री विष्णु पौडेल, राष्ट्रिय योजना आयोगका उपाध्यक्ष शिवराज अधिकारीलगायतले वित्तीय क्षेत्रको वास्तविक समस्या पत्ता लगाउन राष्ट्र बैंक, बिमा प्राधिकरण, बैंक तथा वित्तीय संस्थाका प्रतिनिधिलगायतलाई निर्देशनसमेत दिए ।

आइतबार अर्थ मन्त्रालयमा भएको उच्चस्तरीय वित्तीय क्षेत्र समन्वय समितिको बैठकमा अर्थमन्त्री पौडेलले अर्थतन्त्रमा सुधार हुँदै आए तापनि वित्तीय क्षेत्रमा अपेक्षित सुधार नभएको बताए । यसकारण वित्तीय क्षेत्रको अवस्था सुधारका लागि सबैभन्दा पहिले त्यस क्षेत्रको वास्तविक समस्या पहिचान गर्नुपर्नेमा बैठकमा सहभागीहरूको जोड छ ।

‘वित्तीय क्षेत्रको वास्तविक समस्या के हो भन्ने नै थाहा हुन सकेन, समस्याको पहिचानै नभएकै अवस्थामा समाधानका लाति चालिएका कदम प्रभावकारी हुन सक्दैन,’ बैठकका एक सहभागीले भने, ‘वित्तीय क्षेत्रको वास्तविक समस्या पहिचान गरेर तत्काल अर्को बैठक बसेर समाधान खोज्ने सहमति भएको छ ।’