काठमाडौँ — निजी क्षेत्रको दूरसञ्चार सेवा प्रदायक, एनसेलको शेयर स्वामित्व बिक्री रोक्न माग गर्दै सर्वोच्च अदालतमा दायर रिट खारेज भएको छ । सांसद अमरेशकुमार सिंहले हालेको रिट निवेदनमाथि बिहीबार सर्वोच्च अदालतले सुनुवाइ गर्दै रिट खारेज र निर्देशनात्मक आदेश जारी गर्ने फैसला गरेको छ ।
एनसेलको तत्कालिन मलेसियन कम्पनी आजियाटा ग्रुप बर्हादले गैरआवासीय नेपाली सतिशलाल आचार्यको कम्पनी स्पेक्ट्रलाई यूकेलाई शेयर स्वामित्व बिक्री गरेकोमा सो बिक्री रोक्न माग गर्दै संसद् सदस्य सिंहले रिट दायर गरेका थिए । गत वर्ष मंसिर २२ मा दर्ता सो मुद्दामाथि सर्वोच्च अदालतको पुस ११ को संयुक्त इजलासमा न्यायाधीशद्वय सपना प्रधान मल्ल र टेकप्रसाद ढुंगानाले रिट खारेज गर्दै निर्देशनात्मक आदेश जारी गरेका हुन् ।
पूँजीगत लाभकर छल्ने उद्देश्यले एनसेलले कम्पनीको वास्तविक मूल्यभन्दा कम मूल्यमा शेयर बिक्री गरेको सांसद् सिंहले आफ्नो निवेदनमा दाबी गरेका थिए । एनसेलले नेपालमा करिब ४० अर्ब रुपैयाँ वार्षिक आम्दानी गर्दै आएकोमा ६ अर्ब रुपैयाँमा ८० प्रतिशत शेयर बिक्री गरिनु अपत्यारिलो कुरा भएको सिंहको तर्क थियो । उनले एनसेल, नेपाल दूरसञ्चार प्राधिकरण, सञ्चार तथा सूचना प्रविधि मन्त्रालय, प्रधानमन्त्री तथा मन्त्रिपरिषद् कार्यालय र आन्तरिक राजस्व कार्यालयलाई विपक्षी बनाएर रिट हालेका थिए ।
गत वर्ष सेप्टेम्बरमा एक डलरमा बेलायतमा दर्ता गरिएको स्पेक्ट्रलाइट यूकेले दर्ता भएको दुई महिनापछि नै एनसेलको ८० प्रतिशत सेयर खरिद गरेको थियो । सेयर खरिद-बिक्रीको कारोबार नेपालस्थित सरकारी कार्यालयमा नभई विदेशमै गरिएको थियो । आचार्यको सो कम्पनीलाई ५ करोड अमेरिकी डलर (६ अर्ब ६५ करोड रुपैयाँ) मा एनसेलको शेयर होल्ड गर्ने रेनल्ड होल्डिङ्सको सतप्रतिशत सेयर बिक्री गरेको आजिएटाले एक सूचनामार्फत जानकारी गराएको थियो ।
एनसेलको २० प्रतिशत सेयरको स्थानीय साझेदार सतीशलाल आचार्यकी श्रीमती भावना सिंह श्रेष्ठ सञ्चालक रहेको सुनिभेरा क्यापिटल भेन्चर प्रालिको नाममा रहेको छ । मलेसियन कम्पनी आजियटाले नेपालमा व्यावसायिक चुनौती बढ्दै गएकाले नेपालको दूरसञ्चार सेवा प्रदायक एनसेलमा रहेको आफ्नो सेयर स्वामित्व बिक्री गर्नुपरेको आफ्नो विज्ञप्तीमा उल्लेख गरेको थियो ।
