काठमाडौँ — चक्रपथ दोस्रो खण्ड विस्तारका लागि नेपाल र चीन सरकारका प्रतिनिधिबीच विस्तारमा सहयोग गर्ने पत्रमा हस्ताक्षर भएको चार महिना पुग्न लाग्दा थप काम अझै अघि बढ्न सकेको छैन । कहिले काम सुरु हुन्छ भन्ने कुरामै अझै अलमल कायमै छ । गत भदौ ६ मा नेपाल र चीन सरकारका प्रतिनिधिबीच विस्तारमा सहयोग गर्नेसम्बन्धी पत्रमा हस्ताक्षर भएको थियो ।

कोटेश्वर–कलंकी पहिलो खण्डको काम ०६९ मा सुरु भई ०७५ सालमा सकिएको थियो । सुरुको अवस्थामा दोस्रो खण्ड विस्तारमा नेपाल सरकारले पूर्वतयारीको काम नगर्दा र पछि चीन सरकारका कारण थप काम अघि बढ्न सकेको थिएन ।

अहिले पूर्व तयारीको काम सबै सकिसकेको काठमाडौं चक्रपथ सडक विस्तार योजनाका प्रमुख कृष्णनाथ ओझाले बताए । ‘नेपाल सरकारको तर्फबाट निर्माण गर्नुपर्ने सर्भिस लेन सडक बनाइराखेका छौं, त्यसमा समस्या छैन,’ उनले भने, ‘विस्तार गर्ने सडक खण्डमा पर्ने धुलो र खाल्डाखुल्डी पुर्ने काम पनि भइरहेको छ ।’ तर अहिलेसम्म फिल्डमै आएर चिनियाँ टोलीले काम गरेको जानकारी नभएको उनले सुनाए ।

चीनको अनुदानमा दोस्रो खण्ड कलंकीदेखि वसुन्धरा कल्भर्टसम्म ८.२ किलोमिटर सडक विस्तार गर्न लागिएको हो । चीनसँग सन् २०१८ मा यो सडक खण्ड विस्तारका लागि जीटूजी सम्झौता भएको थियो । चीन सरकारले पूर्वतयारीका काम नटुंग्याई आफूहरू नआउने अडान लिँदै आए पनि काम अघि बढ्न सकेको छैन ।

हस्ताक्षर भइसकेपछिको नयाँ जानकारी केही आइनसकेको सडक विभागअन्तर्गत विकास सहायता कार्यान्वयन महाशाखाका उपमहानिर्देशक विजय जैसीले बताए । कोटेश्वरदेखि कलंकीसम्म १०.३९ किमि सडक बनाउन ६ वर्ष लागेको थियो । यो सडकको चर्चा भएकै ६ वर्ष बढी भइसकेको छ । पटक–पटक यस क्षेत्रका सांसदले सरकारको ध्यानाकर्षण गराउँदा पनि कामले गति लिन सकेको छैन ।  

अब खरिद प्रक्रियामा जाने गरी नै चीनसँग हस्ताक्षर भएको भौतिक पूर्वाधार तथा यातायात मन्त्रालयका सहसचिव एवं प्रवक्ता सुशीलबाबु ढकालले बताए । ‘यसका लागि  चिनियाँ पक्षबाट तयारी भइरहेको बुझिएको छ,’ उनले भने, ‘अब निर्माणमा जानेगरी नै अध्ययन हुन्छ, त्यसपछि निर्माणको काम सुरु हुन्छ ।’