पर्सा — रिलायन्स सुगर मिल बाराले बिहीबारदेखि उखु क्रसिङ सुरु गरेको छ । उद्योगका संचालक राजकुमार अग्रवालले दैनिक १५ देखि २० हजार क्विन्टल उखु क्रसिंङ गर्ने लक्ष्यका साथ उद्योगको क्रसिङ मेसिन बिहीबारदेखि संचालनमा ल्याइएको बताए ।

‘यस वर्ष गढीमाई मेलाको कारण ढिलो गरी उखु क्रसिङ सुरु गर्नु पर्‍यो,’ उनले भने, ‘अघिल्ला वर्षहरु जस्तै मंसिर १० मै उखुको क्रसिङ गर्ने योजना थियो, तर गढीमाइ मेलामा पर्सा र बाराका सडकमा सवारी साधनको अत्यधिक चाप बढेर उखुको ढुवानी गर्न समस्या हुने भएकाले मेलाको भीडभाड घटेलगत्तै क्रसिङ सुरु गरेका हौं ।’ 

यसै सातादेखि किसानलाई उखुको चलान वितरण गरेर उखु संकलन पनि गर्न थाालिएको उनले बताए । ‘एक पटक मेसिन चालु गरेपछि त्यसलाई चाहिने पर्याप्त उखु उद्योग परिसरमै मौज्दात गर्नु पर्छ, नत्र त्यो आत्मघाती कदम हुन जान्छ,’ उनले भने, ‘हामीले पनि दैनिक १५ देखि २० हजार क्विन्टल उखु क्रसिङ हुने सुनिश्चितता गरेर मात्र मेसिन संचालन गरेका हौं ।’ 

यस वर्ष तीनदेखि साढे तीन महिनाको अवधिमा ३० देखि ३२ लाख क्विन्टल उखु क्रसिङ गर्ने लक्ष्य रहेको उनले बताए । उद्योगले बारा, पर्साका किसानबाटै यति परिमाणमा उखु संकलन गर्ने लक्ष्य राखेको छ । यो उद्योग पर्सा. बाराका किसानको उखु किन्ने एकमात्र चिनी मिल हो । 

किसान हकहित संघर्ष समिति पर्साका सचिव पृथ्वी साहले अघिल्ला वर्षहरुमा मंसिरको पहिलो सातातिरै रिलायन्स सुगर मिलले उखुको क्रसिङ सुरु गर्ने गरेकोमा यस वर्ष अत्यन्त ढिला भएको बताए । उनले रौतहटको बाबा बैजुनाथ सुगर मिलले गढीमाई मेला अघि नै उखु क्रसिङ गरेको र छिमेकी भारतस्थित सीमावर्ती क्षेत्रहरुमा रहेका चिनी मिलले पनि १ महिना अघि नै उखु क्रसिङ सुरु गरिसकेको बताए ।