काठमाडौँ — राइड हेलिङ प्लाटफर्म इनड्राइभले विश्वभर ४६ वटा राष्ट्रमा सेवा विस्तार गरिसकेको छ । विश्व विस्तार गर्ने क्रममा सेवाको दिगोपना र सामाजिक उत्तरदायित्व परियोजना प्राथमिकतामा रहेको इनड्राइभले बताएको छ ।
विश्वका मुख्य राष्ट्रहरुमा राइडिङ प्लाटफर्ममा सेवा विस्तार गरिरहेको इनड्राइभले सामाजिक सेवा र उत्तरदायित्वका परियोजना पनि सञ्चालन गरिरहेको इनड्राइभका चिफ अफ स्टाफ इगोर फेडोरोभले बताए । आफ्नो व्यवसायी विस्तार, वर्तमान अवस्था, भावी कार्यक्रम तथा रणनीति सम्बन्धमा जानकारी दिन इन्डोनेसियाको योग्यकर्तामा आयोजित पत्रकार भेलामा उनले यस्तो बताए ।
‘इनड्राइभले ४६ देशमा द्रुत रुपमा गुणस्तरिय रुपमा सेवा दिइरहेको छ,’ उनले भने, ‘२४ करोड भन्दा बढी प्रयोगकर्ताले हाम्रो एफ डाउनलोड गरिसकेका छन्, यो नै हाम्रो सबैभन्दा महत्त्वपूर्ण कोसेढुंगा हो । उहाँहरूकै समर्थनमा इनड्राइभका सेवाहरूलाई थप विस्तार गर्नुपर्नेछ । त्यसमा हामी प्रतिबद्ध छौं ।’ इगोरले सन् २०२५ मा कम्पनीको तीव्र रुपमा थप राष्ट्रहरुमा व्यवसाय विस्तार गर्ने रणनीतिक रहेको पनि जानकारी दिए ।
‘हामी थप देशहरूमा हाम्रो सेवा विस्तार गर्न र विश्वव्यापी रूपमा प्रयोगकर्ताहरूको बढ्दो गतिशीलता आवश्यकताहरू पूरा गर्न नयाँ, प्रतिश्पर्धी र गुणस्तरिय सेवाहरू दिन प्रतिवद्ध छौ,’ इगोर भन्छन, ‘सन् २०२५ मा हामी थप बजारहरूमा प्रवेश गर्ने र सवारी–हेलिङ, डेलिभरी, शहर देखि शहरसम्म यात्रालगायत कार्यक्रमहरु सञ्चालन गर्नेछौ ।’ यो विस्तारले विश्वव्यापी दैनिक जीवनमा सकारात्मक प्रभाव पार्ने उनको दाबी छ ।
नविन सोच, गतिशीलता, स्थिरता र संस्थागत जिम्मेवारीका कारण इन्ड्राइभले भविष्यमा व्यवसायीक उद्योगी व्यवसायीहरुका लागि राम्रो प्लेटफर्म प्रदान गर्ने उनले बताए । ‘इनड्राइभ स्थिरता र संस्थागत उत्तरदायित्वप्रति प्रतिबद्ध छ । मानिस र पर्यावरण दुवैमा सकारात्मक प्रभाव सिर्जना गर्नेमा स्पष्ट छौं,’ इगोर भन्छन, ‘यसकारण पनि कम्पनीले संस्थागत सामाजिक उत्तरदायित्वका विभिन्न कार्यक्रमहरु सुरु गरेको छ । यी कार्यक्रमहरुले प्रभावकारी र दिगो विकास लक्ष्य प्राप्तिमा ठूलो योगदान दिनेमा हामी कटिवद्ध छौं ।’
सामाजिक सेवामा आफ्ना कार्यक्रम केन्द्रित गर्नकै लागि इनड्राइभले ‘इनभिजन’ कार्यक्रम सञ्चालन गरेको छ । यो समुदायमा आधारित परियोजना हो । यसले दिगो विकासलाई प्रवर्द्धन गर्दै व्यावसायिक निरन्तरता र सबै क्षेत्रमा समावेशीतालाई बढवा दिन सामाजिक सेवा र पर्यावरणीय परिवर्तनले ल्याएका समस्या समाधानका क्षेत्रमा काम गरिरहेको बताइएको छ । ‘इनभिजनमार्फत इनड्राइभले पर्यावरण–मैत्री यातायात समाधानहरू प्रवर्द्धन गर्न, यातायात सेवा नभएका नागरिकलाई गुणस्तिरिय सेवा दिन र वातावरणमा कमभन्दा कम क्षति पुर्याउनेमा निकै सचेत छौ,’ इगोर भन्छन, ‘इनभिजनका साथ इनड्राइभले विश्वभर सकारात्मक योगदानसहित व्यवसायीक वृद्धि र सफलता प्राप्तिको लक्ष्य राखेको छ ।’
सामाजिक उत्तरलायित्व अन्तरगत समाजमा कला, संस्कृतिको जर्गेना गर्ने उद्देश्यले गत वर्ष देखि इनड्राइभले विश्वव्यापी रुपमा ‘अल्टरनेटिभ फिल्म महोत्सव’ गर्दै आएको छ । सोही क्रममा इनड्राइभले गत साता इन्डोनेसियाको योग्यकार्तामा ‘अल्टरनेटिभ फिल्म महोत्सव एंव पुरस्कार वितरण’को दोस्रो संस्करण आयोजना गरेको थियो । जसमा सुविना श्रेष्ठ निर्देशित नेपाली वृत्तचित्र ‘देवी’ पनि मनोनयनमा परेको थियो । यद्यपि ‘देवी’ले कुनै पुरस्कार भने हात पारेन ।
लामो समयदेखि बिनादर्ता र अनौपचारिक रूपमा सेवा सञ्चालन गरिरहेको राइड हेलिङ प्लाटफर्म इनड्राइभले गत वैशाखमा उद्योगका रूपमा दर्ता भएको हो । सरकारले औद्योगिक व्यवसाय ऐन, ०७६ संशोधन गर्दै राइड सेयरिङलाई सेवामूलक उद्योगको मान्यता दिएपछि इनड्राइभले कानुनबमोजिम आफूलाई औपचारिक व्यवसायका रूपमा अघि सारेको हो ।
कुल लगानीका रूपमा ५ करोड रुपैयाँ प्रत्यक्ष वैदेशिक लगानी भित्र्याउँदै इनड्राइभ प्रतिस्पर्धात्मक राइड सेयरिङ व्यवसायमा सामेल भएको हो । प्यानमा दर्तालगायतका करसम्बन्धी प्रक्रिया पनि पूरा भइसकेकाले अब राइडरहरूबाट कमिसन उठाउन सुरु गरेको थियो ।
