३०.१२°C काठमाडौं
बझाङ — सुदूरपश्चिमको विकासका लागि महत्त्वपूर्ण मानिएको चैनपुर सेती जलविद्युत् आयोजनाको काम दुई महिनादेखि ठप्प छ । नेपाल विद्युत् प्राधिकरणले निर्माण गरिरहेको २ सय १० मेगावाट क्षमताको आयोजना निर्माणको काम गर्दा सम्बद्ध सरकारी प्रक्रिया पूरा नगरी थालिएको भन्दै डिभिजनल वन कार्यालय बझाङले रोकेको हो ।
डिभिजनल वन कार्यालयले गत असार २६ मा ताकेता पत्र पठाउँदै आयोजना निर्माणको काम वन ऐन र नियमावली बर्खिलाप हुने गरी भइरहेकाले तत्काल रोक्का राख्न भनेको थियो ।
वन कार्यालयले आयोजनाको काम रोक्न जिल्ला प्रशासन कार्यालय, नेपाली सेनालगायत निकायलाई पत्राचार गरेका कारण आयोजनाले अधिग्रहण गरेको जग्गामा भइरहेको काम पनि रोकिएको हो । असार अन्तिम साता डिभिजनल वन अधिकृत शम्भुप्रसाद तिवारीले अवैध निर्माण कार्य रोक्न भन्दै नेपाली सेनालाई पनि पत्र पठाएका थिए ।
राष्ट्रिय वन क्षेत्रको प्रयोग गरी आयोजनाले निर्माण कार्य गरिरहेको र उक्त काम गर्दा वन ऐन, २०७६ को दफा ४२ र वन नियमावली, २०७९ को नियम ८७ देखि ९७ सम्मका आवश्यक प्रक्रिया पूरा नगरेको पत्रमा उल्लेख थियो ।
‘वन नियमावलीको नियम ९८ को उपनियम (१) बमोजिम राष्ट्रिय वन क्षेत्रमा नेपाल सरकारबाट अनुमति प्राप्त विकास आयोजना सञ्चालन गर्नुअघि सम्बन्धित विकास आयोजना सञ्चालकले त्यस्तो आयोजना सञ्चालनका लागि प्राप्त अनुमतिपत्र वन तथा भू–संरक्षण विभागसँग गरेको सम्झौताबमोजिम प्रयोग गर्न दिएको अनुमतिपत्र तथा अन्य कागजातसहित वन क्षेत्रमा प्रवेशका लागि डिभिजन वन कार्यालयमा निवेदन दिनुपर्ने र सोही नियमको उपनियम (२) मा त्यस्तो निवेदन परे डिभिजनल वन अधिकृतले सोउपर आवश्यक जाँचबुझ गरी राष्ट्रिय वन क्षेत्रमा विकास आयोजना सञ्चालनका लागि प्रवेश गर्न इजाजत दिनुपर्नेछ भन्ने स्पष्ट व्यवस्था भएकामा त्यस आयोजनाबाट त्यस्ता कुनै पनि कानुनी प्रक्रिया पूरा नगरी प्रचलित ऐन, नियमविपरीत राष्ट्रिय वन क्षेत्र प्रयोग गरिरहेकाले उक्त काम तुरुन्त रोक्का राख्न हुन पुनः जानकारी गराइन्छ,’ पत्रमा भनिएको छ । यसअघि पनि यो प्रक्रिया नहुन्जेल काम रोक्न ताकेता गरिएको तर आयोजनाले पत्रको बेवास्ता गरेको पत्रमा उल्लेख छ ।
वन कार्यालयको पत्रपछि आयोजनाको आफ्नै नाममा भएको जग्गामा भइरहेको काम पनि रोकिएको र यसले निर्माणमा व्यवधान भएको चैनपुर सेती जलविद्युत् आयोजनाले जनाएको छ ।
प्रकाशित : आश्विन २, २०८१ ०५:४६
