काठमाडौँ — यात्री मोटरसाइकल्स्ले विद्युतीय स्कुटर निर्माणसँगै आफ्नो उत्पादन कार्य सुचारु गर्ने भएको छ । ‘प्रोजेक्ट टु’ अन्तर्गतको ई–स्कुटर निर्माणमा सिप्रदी ट्रेडिङले यात्रीलाई सघाउने भएको छ । यात्री र सिप्रदीबीच ज्वाइन्ट भेन्चर परियोजनाका लागि सहमतिसमेत भइसकेको छ ।

‘देशको बाटो र माटो सुहाउँदो गुणस्तरीय दुईपांग्रे सवारीसाधन उत्पादन गर्न हामीले यो सम्झौता गरेका छौं,’ यात्रीका एक उच्च अधिकारीले भने, ‘नेपालको भूगोललाई मिल्ने खालको, यहाँको दुईपांग्रे बजारलाई गुणस्तरीय प्रोडक्ट दिने यात्रीको लक्ष्य हो ।’ सिप्रदीका अधिकारले पनि विदेशबाट इलेक्ट्रिक स्कुटर आयात नगरी नेपालकै कम्पनीलाई स्कुटर बनाउन दिँदा भूगोल सुहाउँदो प्रोडक्ट बन्ने अपेक्षा राखेको प्रतिक्रिया दिएका छन् । 

मेड इन नेपाल मोटरसाइकल ‘यात्री’ को यात्रा 

‘अहिले नेपाल भित्रिरहेका जति पनि ईभी छन्, नेपालको भूबनोटलाई नमिल्ने र राइडरले कतै न कतै धोका पाइरहेको देखिन्छ,’ यात्रीका अधिकारीले भने, ‘हामीले नेपालको भूगोल अध्ययन गरेर नेपाललाई मिल्ने स्पेक्स भएको स्कुटर बनाउन यो ज्वइन्ट भेन्चर गरेका हौं ।’ यात्री मोटरसाइकल्स्ले यसअघि ‘प्रोजेक्ट जिरो’ र ‘प्रोजेक्ट वान’ अन्तर्गत जेन वान र जेन टु स्पोर्ट्स बाइक उत्पादन गरेको थियो । प्रोजेक्ट टु स्कुटरपछि प्रोजेक्ट थ्री रोड बाइक बनाउने कम्पनीले जानकारी दिएको छ ।