काठमाडौँ — श्री एयरलायन्सले आफ्नो बेडामा मंगलबार ८० सिट क्षमताका दुइटा बम्बार्डियर ड्यास–८–क्यू–४०० जहाज थपेको छ । योसँगै श्रीसँग फिक्स्ड विङ (जहाज) १० र  ८ वटा रोटर (हेलिकोप्टर) गरी वायुयानको संख्या १८ पुगेको छ । श्रीपछि नेपालमा सर्वाधिक जहाज हुनेमा बुद्ध एयर रहेको छ । योसँग हाल उडानमा १७ वटा एटीआर विमान छन् ।

थपिएका विमानबाट पोखरा, सुर्खेत, जनकपुर तथा सिमरालगायतका आन्तरिक गन्तव्यमा उडान सेवा विस्तार गर्ने श्रीले जनाएको छ । जहाज थपिएसँगै तुम्लिङटार तथा भरतपुर विमानस्थलमा समेत नियमित उडान सञ्चालन गर्ने कम्पनलीले जनाएको छ ।

कम्पनीले सन् २०१९ मा २ वटा र सन् २०२२ मा थप २ गरी ४ वटा ८० सिट क्षमताको क्यानडानिर्मित बम्बार्डियर ड्यास–८–क्यू–४०० जहाज ल्याएको थियो । त्यसअघि यसले ५० र ७० सिटका सीआरजे विमान आन्तरिक उडानमा ल्याएको थियो ।  सुरुमा श्रीले काठमाडौं विमानस्थलबाट भद्रपुर, विराटनगर, भैरहवा, नेपालगन्ज, धनगढी तथा पर्वतीय उडान नियमित रूपमा हवाई सेवा सञ्चालन गरेको थियो ।

मंगलबार ल्याइएका दुइटा बम्बार्डियर ड्यास–८–क्यू–४०० जहाज यसअघि अमेरिकाको होराइजन एयर तथा अलास्का एयरले उडाउँदै आइरहेका थिए । श्रीका प्रबन्धक अनिल मानन्धरका अनुसार, अत्यन्तै आरामदायक, सुरक्षित  यी जहाजलाई श्रीकै पाइलटहरूले अमेरिकाको अरेगन राज्यको पोर्टल्यान्डबाट मिनेसोटा राज्यको डुलुथ, क्यानडाको गुजबे, आइसल्यान्डको केफलामिक, जर्मनीको म्युनिक, इजिप्टको कायरो, संयुक्त अरब इमेरिटसको दुबई तथा भारतको इन्दौर हुँदै मंगलबार त्रिभुवन अन्तर्राष्ट्रिय विमानस्थमा अवतरण गराएका हुन् ।

अमेरिकाबाट नेपाल पुग्न यी दुवै विमान तीनवटा रात्रिबिसानमा २५ घण्टामा करिब १० हजार माइल (१६ हजार किलोमिटर) को हवाई दूरी पार गर्दै मंगलबार अपराह्न काठमाडौंमा अवतरण भएका हुन् । नेपाल नागरिक उड्डयन प्राधिकरणका कानुनी प्रक्रियाहरू यथाशीघ्र पूरा गरी यी विमानहरूलाई श्री एयरलायन्सले आफ्ना आन्तरिक सेवाको गन्तव्यहरूमा उडान थप गर्ने जनाएको छ ।