काठमाडौँ — कृषि तथा पशुपन्छी विकास मन्त्रालयले उखु किसानलाई अनुदानबापत ८० करोड रुपैयाँ भुक्तानी दिएको छ । गत आर्थिक वर्ष २०७९/८० मा किसानलाई भुक्तानी गर्नुपर्ने एक अर्ब ३२ करोड रुपैयाँमध्ये चालु आर्थिक वर्षमा सो रकम भुक्तानी गरिएको हो । 

अब सम्बन्धित जिल्लामा निकासा गरेपछि त्यहाँका किसानले उपलब्ध गराएको विवरणका आधारमा किसानको खातामा रकम भुक्तानी हुने मन्त्रालयका सहसचिव एवं प्रवक्ता शवनम सिवाकोटीले जानकारी दिइन् ।

सरकारले उखु किसानको संरक्षण र कृषि व्यवसाय प्रवर्द्धन गर्न हरेक वर्ष उखुको न्यूनतम खरिद मूल्य तोक्दै आएको छ भने त्यसमा थप अनुदान दिने व्यवस्था गरेको छ । चालु आर्थिक वर्षका लागि उखुको न्यूनतम खरिद मूल्य प्रतिक्विन्टल पाँच सय ६५ रुपैयाँ र नेपाल सरकारले प्रदान गर्ने अनुदान रकम प्रतिक्विन्टल ७० रुपैयाँ निर्धारण गरिएको छ ।