२५.१२°C काठमाडौं
काठमाडौंमा वायुको गुणस्तर: १२०

स्वास्थ्य परीक्षण केन्द्रमा मलेसियाका गृहमन्त्रीको अनुगमन

गुणस्तरीय स्वास्थ्य परीक्षण मलेसियाको प्राथमिकता : फुद्दिन नासुसन इजमाइल

काठमाडौँ — मलेसियाका गृहमन्त्री फुद्दिन नासुसन इजमाइलले मलेसिया जाने कामदारको स्वास्थ्य जाँच गर्ने स्वास्थ्य परीक्षण केन्द्र अनुगमन गरेका छन् ।

स्वास्थ्य परीक्षण केन्द्रमा मलेसियाका गृहमन्त्रीको अनुगमन

श्रम, रोजगार तथा सामाजिक सुरक्षामन्त्री डोलप्रसाद अर्यालको नेतृत्वसँग बैठक सकेपछि गृहमन्त्री टोलीले सिनामंगलस्थित अनमोल मेडिकल सेन्टरको अनुगमन गरेको हो । उक्त सेन्टरसहित ३६ वटा स्वास्थ्य परीक्षण केन्द्र मलेसिया सरकारको विदेशी कामदार केन्द्रीय व्यवस्थापन प्रणाली (एफडब्लुसिएमएस)सँग जोडिएको प्रणाली हो ।

मलेसियामा पुगेपछि मेडिकल अनफिट हुनेको संख्या बढेको भन्दै मलेसियाले स्वास्थ्य मापदण्ड बनाई २०१४ देखि स्वास्थ्य परीक्षणमा कडाइ गर्दै आएको हो । स्वास्थ्य परीक्षण पास भएको रिपोर्टलाई सिधै मलेसियाको गृह मन्त्रालयले अपलोड गरेपछि मात्रै भिसा जारी हुने प्रावधान छ ।

नेपाल र मलेसियाबीच २०७५ कात्तिकमा श्रम सम्झौतापछि दुई देशका गृह, श्रम, परराष्ट्र र कानुन मन्त्रालयका उच्च अधिकारीहरू संलग्न दोश्रो संयुक्त प्राविधिक बैठकले नेपालमा कामदारले स्वास्थ्य परीक्षण गर्न लागेको खर्च मलेसिया पुगेपछि पहिलो महिनामा रोजगारदाताले सोधभर्ना दिने निर्णय गरेको थियो ।

जस अनुसार नेपालमा स्वास्थ्य परीक्षण हुँदै आएको छ । त्यसअघि स्वास्थ्य परीक्षणको खर्च कामदार आफैंले गर्नुपर्थ्यो । स्वास्थ्य परीक्षणको क्रममा सुरक्षा जाँच (फिङ्गरिङ) पनि हुँदै आएको छ । यसले मलेसिया गएर फर्केका कामदार गृह मन्त्रालयको कालोसूचीमा रहेको वा नरहेको पहिचान गर्नेछ । मलेसियाले डिपोर्ट गरी पठाएका कामदार पुन: मलेसिया जान पाउँदैनन् ।


शुक्रबार अनुगमनपछि मलेसियाका गृहमन्त्री इजमाइलले गुणस्तरीय स्वास्थ्य परीक्षणमा आफ्नो मन्त्रालयलले जोड दिएको बताए । गृह मन्त्रालयले आवश्यकका अनुसार स्वास्थ्य परीक्षण केन्द्रको अनुगमन गर्न टोली पठाउने पनि उनको भनाइ छ । नेपाल स्वास्थ्य व्यवसायी महासंघका अध्यक्ष कैलास खड्काले गृहमन्त्री इजमाइललाई अनमोल सेन्टरमा स्वागत गर्दै कामदारको गुणस्तरीय स्वास्थ्य परीक्षण गर्न मलेसियाका स्वास्थ्य मापदण्डलाई पूर्ण रुपमा पालना गरेको बताएका थिए ।

वैदेशिक रोजगारमा जाने कामदारको स्वास्थ्य परीक्षण गर्न अनुमति दिएको संस्थामध्येबाट गन्तब्य देशहरुले कामदारको स्वास्थय परीक्षण गराउँदै आएका छन् । जसअनुसार मलेसियाले ३६, खाडी देशहरुका स्वास्थ्य संगठन गल्फ कोअपरेसन काउन्सिल (गाम्का)ले साउदी, बहराइन, युएई, ओमनका लागि १२ र कतारले एउटाबाट मात्रै स्वास्थ्य परीक्षण गर्दै आएका छन् ।

प्रकाशित : माघ २०, २०७९ १६:०१
प्रतिक्रिया
पठाउनुहोस्
जनताको राय

सहकारी ठग्नेलाई कारबाहीको दबाब दिन प्रमुख विपक्षी दल कांग्रेसले गरेको सडक आन्दोलन घोषणालाई कसरी लिनुभएको छ ?