असोजमा रेमिट्यान्स आप्रवाह १७ प्रतिशतले बढ्यो- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

असोजमा रेमिट्यान्स आप्रवाह १७ प्रतिशतले बढ्यो

कान्तिपुर संवाददाता

काठमाडौँ — रेमिट्यान्स आप्रवाहमा सुधार आउने क्रमले गत असोजमा पनि निरन्तरता पाएको छ । राष्ट्र बैंकका अनुसार गत असोजमा रेमिट्यान्स आप्रवाह करिब १६.८ प्रतिशतले बढेको छ ।

गएका तीन महिनामा रेमिट्यान्समार्फत २ खर्ब ८१ अर्ब ५ करोड रुपैयाँ नेपाल भित्रिएको राष्ट्र बैंकको प्रतिवेदनमा उल्लेख छ । गत आर्थिक वर्षको असोजसम्म रेमिट्यान्स आप्रवाह ७.१ प्रतिशतले घटेको थियो । ‘अमेरिकी डलरमा रेमिट्यान्स आप्रवाह ७.९ प्रतिशतले बढेर २ अर्ब १९ करोड पुगेको छ,’ प्रतिवेदनमा भनिएको छ, ‘अघिल्लो वर्ष यस्तो आप्रवाह ७.१ प्रतिशतले घटेको थियो ।’

यस्तै, तीन महिनाको अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या १ सय २३.१ प्रतिशतले बढेर १ लाख ४७ हजार ९ सय ३२ पुगेको छ । सोही अवधिमा वैदेशिक रोजगारीका लागि पुन: श्रम स्वीकृति लिने नेपालीको संख्या गत असोजमा ६६.२ प्रतिशतले बढेको छ । गत आर्थिक वर्षको सोही अवधिमा यस्तो संख्या २१९.७ प्रतिशतले बढेको थियो ।

प्रकाशित : कार्तिक ३०, २०७९ १६:१४
प्रतिक्रिया
पठाउनुहोस्

सप्तरी-२ मा सत्ता गठबन्धनको र्‍याली

अवधेशकुमार झा

राजविराज — सप्तरीको निर्वाचन क्षेत्र नम्बर २ को राजविराजमा सत्ता गठबन्धनले बुधबार र्‍याली निकालेको छ । गठबन्धनका तर्फबाट यस क्षेत्रका प्रतिनिधिसभा सदस्य उम्मेदवार लोकतान्त्रिक समाजवादी पार्टीका जयप्रकाश ठाकुर, प्रदेशसभाअन्तर्गत २(१)का उम्मेदवार लोसपाकै सरोजकुमार मण्डल र २(२) बाट माओवादीका उमेशकुमार यादवको अगुवाइमा र्‍याली निकालिएको हो ।

पबिमावि अगाडिबाट निस्किएको र्‍यालीले राजविराज बजार क्षेत्रको परिक्रमा गरेको थियो । र्‍यालीमा सहभागी उम्मेदवार र समर्थकहरुले सप्तरी क्षेत्र नम्बर २ को प्रतिनिधिसभा र दुईवटै प्रदेश सभामा आफूहरुको उम्मेदवार जित्ने दाबी गरे ।

र्‍यालीमा सत्ता गठबन्धनका घटक दलहरु नेपाली कांग्रेस, माओवादी, लोकतान्त्रिक समाजवादी पार्टी र नेकपा (एकीकृत समाजवादी)का कार्यकर्ताहरुको सहभागिता थियो । निर्वाचन क्षेत्रका ग्रामीण क्षेत्रहरुबाट समेत सत्ता गठबन्धनका कार्यकर्ताहरु बुधबार राजविराज ओइरिएका थिए ।

सप्तरी २ बाटै जसपा अध्यक्ष उपेन्द्र यादव र जनमत पार्टीका अध्यक्ष सिके राउत पनि चुनावी मैदानमा छन् ।

प्रकाशित : कार्तिक ३०, २०७९ १६:०४
पूरा पढ्नुहोस्
प्रतिक्रिया
पठाउनुहोस्
×