सोलारको पीपीए दर ५ रुपैयाँ ९४ पैसा- अर्थ / वाणिज्य - कान्तिपुर समाचार

सोलारको पीपीए दर ५ रुपैयाँ ९४ पैसा

कान्तिपुर संवाददाता

काठमाडौँ — नेपाल विद्युत् प्राधिकरणले सौर्य ऊर्जा (सोलार) आयोजनाहरूबाट उत्पादित बिजुली खरिद–बिक्रीका लागि आधार दर (बेसरेट) तोकेको छ ।

सोलार आयोजनाहरूमा ५ रुपैयाँ ९४ पैसालाई बेसरेट मानेर विद्युत् खरिद सम्झौता (पीपीए) गर्ने निर्णय प्राधिकरणले गरेको कार्यकारी निर्देशक कुलमान घिसिङले जानकारी दिए ।

अब प्राधिकरणले सोलार आयोजनाबाट उत्पादित बिजुली प्रतियुनिट ५ रुपैयाँ ९४ पैसाभन्दा महँगोमा किन्नेछैन । ‘बेसरेटभन्दा माथि पीपीए हुँदैन । त्योभन्दा कम बोलकबोल गर्नेलाई प्रतिस्पर्धाका आधारमा पीपीए गरिनेछ,’ घिसिङले भने ।

सोलार आयोजनाहरूलाई प्रतिस्पर्धाका आधारमा मात्र पीपीए गर्ने निर्णय गत माघ पहिलो साता बसेको प्राधिकरणको सञ्चालक समितिबाट भएको थियो । माघ ९ मा बसेको सञ्चालक समितिले पीपीएको बेसरेट तोक्न कार्यदलसमेत गठन गरेको थियो । कार्यदलको सुझावका आधारमा प्राधिकरणले बेसरेटसम्बन्धी निर्णय गरेको हो । आधार दर पीपीएको अधिकतम दरका रूपमा रहन्छ ।

प्रकाशित : फाल्गुन २९, २०७८ ०७:१४
प्रतिक्रिया
पठाउनुहोस्

यूएईसँग श्रम बैठक तय

कान्तिपुर संवाददाता

काठमाडौँ — नेपाल र संयुक्त अरब इमिरेट्स (यूएई) बीच भएको श्रम सम्झौतालाई प्रभावकारी कार्यान्वयन गर्न उच्चस्तरीय श्रम अधिकारीहरूबीचको दोस्रो संयुक्त बैठक मार्च १५ मा आबुधावीमा हुने भएको छ ।

बैठकमा नेपालका तर्फबाट श्रम, रोजगार तथा सामाजिक सुरक्षामन्त्री कृष्णकुमार श्रेष्ठको नेतृत्वको ५ सदस्यीय टोली सहभागी हुनेछ । त्यसका लागि टोली सोमबार यूएई जाँदै छ ।

श्रम मन्त्रालयका अनुसार बैठकमा श्रममन्त्री श्रेष्ठ र श्रम सचिव एकनारायण अर्याल पर्यवेक्षक रहनेछन् । श्रम सहसचिव राजीव पोखरेलले बैठकको नेतृत्व गर्नेछन् । परराष्ट्र मन्त्रालयका तर्फबाट कन्सुलर विभागका निर्देशक प्रकाश अधिकारी र श्रम उपसचिव थानेश्वर भुसालसमेत बैठकमा सहभागी हुनेछन् ।

‘दुवै देशको समन्वयमा मात्रै श्रम सम्झौताको प्रभावकारी कार्यान्वयन हुन्छ । श्रम सम्झौता कार्यान्वयनमा देखिएका जटिलता सम्बोधन गर्न यी बैठक निकै महत्त्वपूर्ण छ,’ श्रम मन्त्रालयका सहायक प्रवक्ता भुसालले भने, ‘बैठकमा श्रम बजारमा देखिएका चुनौती, श्रम सम्झौता कार्यान्वयनलगायत विषयमा छलफल हुनेछ ।’

प्रकाशित : फाल्गुन २९, २०७८ ०७:१३
पूरा पढ्नुहोस्
प्रतिक्रिया
पठाउनुहोस्
×