कोरिया जाने कामदारलाई १५०० डलर सटही सुविधा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — दक्षिण कोरिया जाने नेपाली कामदारले १ हजार ५ सय अमेरिकी डलरसम्म सटही सुविधा पाउने भएका छन् । कोभिडका कारण क्वारेन्टिनमा बस्नुपर्ने अवस्थामा कोरिया जाने कामदारलाई विद्युतीय कार्डका माध्यमबाट १ हजार ५ सयसम्म सटही सुविधा दिन राष्ट्र बैंकले निर्देशन दिएको हो ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![कोरिया जाने कामदारलाई १५०० डलर सटही सुविधा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/third-party/kamdar-0972021031533-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
हाल रोजगारीमा जाने कामदारका लागि प्रतिव्यक्ति २ सय अमेरिकी डलरसम्म सटही सुविधा दिने व्यवस्था छ । तर, वैदेशिक रोजगारीका लागि दक्षिण कोरिया जाने नेपाली कामदारका लागि कोभिड १९ का कारण क्वारेन्टिन खर्चबापत उक्त सुविधा उपलब्ध गराउन राष्ट्र बैंकले भनेको हो । यसका लागि कामदारले क्वारेन्टिन खर्चबापतको व्यहोरा खुल्ने वैदेशिक रोजगार विभागको सिफारिसपत्र पेस गर्नुपर्नेछ ।
भारतबाहेक अन्य मुलुकको भ्रमणमा जाने नेपाली नागरिकलाई राहदानीबापत प्रतिपटक अमेरिकी डलर १ हजार ५ सय वा सो बराबरको परिवर्त्य विदेशी मुद्रासम्म सटही सुविधा दिने प्रावधान छ । अलग्गै राहदानी नलिई अभिभावकको साथमा जाने केटाकेटीलाई अधिकतम अमेरिकी डलर ५ सयसम्म सटही पाउन सकिन्छ ।
नेपाल सरकारले जारी गरेको यात्रा अनुमतिपत्रका आधारमा विदेश भ्रमणमा जान राहदानी सुविधा माग भई आए त्यस्ता व्यक्तिलाई अमेरिकी डलर १ हजारसम्मको सटही सुविधा प्रदान गर्नुपर्ने व्यवस्था छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)