इजरायल रोजगारीमा जान १ हजार ६ सयको नाम सिफारिस- अर्थ / वाणिज्य - कान्तिपुर समाचार

इजरायल रोजगारीमा जान १ हजार ६ सयको नाम सिफारिस

रासस

काठमाडौँ — नेपाल सरकार र इजरायल सरकारबीच भएको श्रम सम्झौताअनुसार इजरायलका दीर्घकालीन स्याहार केन्द्रमा पठाउन एक हजार ६ सय जनाको नाम सार्वजनिक भएको छ । वैदेशिक रोजगार विभागले रोजगारीका लागि इजरालय जान लिइएको लिखित र अन्तर्वाताका आधारमा उनीहरुलाई छनोट गरेको हो ।

नेपालस्थित इजरायली दूतावासबाट परराष्ट्र मन्त्रालयमार्फत १ हजार ६ सय (७० प्रतिशत महिला र ३० प्रतिशत पुरुष) उम्मेदवार सिफारिस गर्न माग गरेको थियो । परीक्षामा १ हजार ८ सय ३ सहभागीमध्ये शैक्षिक योग्यता र तालिमको प्रमाणपत्र प्रमाणीकरण हुन नसकेको सङ्ख्या घटाउँदा कायम भएका उम्मेदवारमध्ये अन्तर्वाता र लिखित परीक्षा लिइएको थियो ।

लामो समयसम्म रोजगारीका लागि इजरायल जान रोकिएको भए पनि उसले नै दुई वर्ष पहिले दुई देशका सरकारबीचको सहमति सम्झौताबाट खुलाउने इच्छा देखाएको मन्त्रालयले जनाएको छ । विभागले लिएको लिखित परीक्षामा ६ हजार ३ सय १७ सहभागीमध्ये २ हजार ३९ जना लिखित परीक्षामा उत्तीर्ण भएका थिए ।

विभागले यही असोज १ देखि ३ गतेसम्म उचाइ र तौलको परीक्षा लिएकोमा त्यस बीचमा छुटेका व्यक्तिलाई अन्तर्वार्ता अवधिभरलाई अवसर दिएको थियो । सम्झौताअनुसार १ हजार जना इजरायल जाने मन्त्रालयले जनाएको छ ।

प्रकाशित : आश्विन १०, २०७८ १७:०७
प्रतिक्रिया
पठाउनुहोस्

काभ्रेका अधिकांश स्थानीय तहमा कांग्रेसको सर्वसम्मत नेतृत्व चयन

नगेन्द्र अधिकारी

काठमाडौँ — काभ्रेका १३ स्थानीय तहमध्ये १२ स्थानीय तहमा कांग्रेस नेतृत्व चयनको प्रक्रिया टुंगिएको छ । कांग्रेस १४ औं महाधिवेशनअन्तर्गत शनिबार भएका अधिवेशनमध्ये ७ स्थानीय तहमा सर्वसम्मत भयो भने ५ वटामा निर्वाचनबाट नेतृत्व टुंगो लागेको छ ।

बनेपा नगरपालिकामा १ मतको अन्तरले निवर्तमान कार्यसमितिका सचिव महेशकुमार कर्माचार्य सभापतिमा विजयी भएका छन् । कर्माचार्यले १ सय ३० मत पाउँदा अर्का प्रत्यासी शान्तिरत्न शाक्यले १ सय २९ मत पाएका थिए ।

धुलिखेलमा बिदुरबहादुर बस्नेत निर्वाचित भए । मण्डनदेउपुर नगरपालिकामा कश्यप पौडेल, बेथानचोक गाउँपालिकामा प्रेमबहादुर तिमल्सिना र तेमालमा ज्ञानबहादुर तामाङ निर्वाचित भएका छन् ।

यसअघि नमोबुद्ध नगरपालिकामा कुन्साङ लामा, पनौतीमा रामशरण भण्डारी, पाँचखालमा सञ्जय तामाङ, रोशी गाउँपालिकामा दुधराज तामाङ, भुम्लुमा दावा लामा, चौरीदेउरालीमा शेरबहादुर तामाङ, खानीखोलामा दोर्जेमान जिम्बा निर्विरोध भइसकेका छन् । महाभारत गाउँपालिकामा भने नेतृत्व चयनको प्रक्रिया जारी रहेको जिल्ला निर्वाचन अधिकृतको कार्यालयले जनाएको छ ।

प्रकाशित : आश्विन १०, २०७८ १६:५०
पूरा पढ्नुहोस्
प्रतिक्रिया
पठाउनुहोस्
×