काठमाडौँ — नेपाल–संयुक्त राज्य अमेरिका व्यापार र लगानी फ्रेमवर्क सम्झौता (टिफा) अन्तर्गतको व्यापार र लगानीसम्बन्धी काउन्सिलको पाँचौं बैठकले आर्थिक वृद्धिलाई बढावा दिन डिजिटल व्यापारको भूमिकालाई महत्त्व दिनुपर्नेमा जोड दिएको छ । 

नेपाल र अमेरिका दुवै देश डिजिटिल अर्थतन्त्र प्रवर्द्धनमा सहकार्य गर्न सहमत भएका छन् । बैठकमा भएका प्रतिबद्धता कार्यान्वयनका लागि आगामी दिनमा द्विपक्षीय बैठक बस्ने र टिफा काउन्सिलको छैटौं बैठक नेपालमा आयोजना गर्नेमा पनि दुवै सरकारबीच सहमति भएको छ । 

मंगलबार भर्चुअल माध्यमबाट भएको बैठकको सहअध्यक्षता नेपालका तर्फबाट उद्योग, वाणिज्य तथा आपूर्ति मन्त्रालयका सचिव वैकुण्ठ अर्याल र दक्षिण तथा मध्य एसियाका लागि संयुक्त राज्य अमेरिकाका सहायक प्रतिनिधि क्रिस्टोफर विल्सनले गरेका थिए । दुवै सरकारका प्रतिनिधिमण्डलमा व्यापार, वित्त, श्रम र अन्य निकायका अधिकारी सम्मिलित थिए । बैठकमा भन्सार र व्यापार सुविधा, बौद्धिक सम्पत्ति, डिजिटल ट्रेड र ई–कमर्स, श्रम, वित्तीय सेवा, लगानी प्रवर्द्धन, कृषि उत्पादनको व्यापार अमेरिकाले नेपाललाई उपलब्ध गराएको व्यापार सहुलियतलगायतका द्विपक्षीय व्यापार तथा लगानीसम्बन्धी विविध विषयमा छलफल भएको बिहीबार जारी संयुक्त वक्तव्यमा उल्लेख छ ।