अझै टुकीको भर- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

अझै टुकीको भर

अनिश तिवारी

सिन्धुपाल्चोक — बिजुलीका तारसँगै बस्तीपिच्छै फलामे खम्बा अनि थोत्रा ट्रान्समिटर । केही घरमा मिटर बक्स पनि राखिएको छ । जताततै लगिएका तार घरमा नजोडिएको पनि होइन । तर त्यहाँ कहिल्यै बिजुली आएन ।

‘दुई वर्ष पुग्यो, खम्बा गाडेर तार टाँगेको तर बिजुली बलेन । के खान यो पोल र तार टाँगिएको हो ? अचम्म लाग्छ,’ भोटेकोसी गाउँपालिका–५ मार्मिङ चन्द्रखुकी ७० वर्षीया सुनमाया शेर्पाले भनिन् । जाडो सुरु भएसँगै घाम नलागेपछि सोलार पनि चार्ज गर्न नपाएकी उनी टुकीको भरमा बस्नुपरेको गुनासो गर्छिन् । ‘कतिन्जले यसरी जीवन बिताउनु, कहिले आउँछ हाम्रो गाउँमा बिजुली ?’ उनले प्रश्न गरिन् ।

भोटेकोसी क्षेत्रमा शिवश्री जलविद्युत् आयोजनाबाट विद्युत् उत्पादन पूरा भएलगत्तै २०६६ सालमा बिजुली जोड्ने तयारीसहित खम्बा र तार लगाइएको थियो । ‘केही महिना बिजुली पनि आयो तर पछि फेरि काटियो, त्यसपछि बिजुली फर्किएन,’ स्थानीय ६७ वर्षीय सुनबहादुर शेर्पाले भने । सोलारको भरमा गाउँमा राति आवश्यक परे मात्रै उज्यालो हुने गरेको छ । महँगा सोलार र ब्याट्री पनि अत्यधिक चिसोको कारण प्रायः बिग्रिएपछि विकल्प भनेको टुकी मात्र हुने गरेको चन्द्रखु पल्लो टोलका शेर्पाले बताए । ‘हिउँद र बर्खामा घाम नलागेपछि सोलार चार्ज हुँदैन, टुकीको भरमा जे परे पनि दौडिनुपर्छ,’ उनले भने ।

दोलखा र सिन्धुपाल्चोकको भोटेकोसी–५ बाट चीन क्षेत्र जोड्ने मार्गस्थित गौरीशंकर हिमाल र प्रसिद्ध धार्मिकस्थल देउढुंगा, दामुछे पोखरी पुग्ने पदमार्ग जोड्ने चन्द्रखु गाउँ पुग्नै झन्डै एक दिन लाग्छ । ‘सडक जोडिए पनि हामीले बिजुलीको अभाव व्यर्होनुपरेको छ । यसबारे प्राधिकरणलाई आग्रह गरेका छौं, वडा र पालिकामा पनि निवेदन दिएका छौं, अब चाँडै बिजुली बल्ने प्रतिबद्धता पाएका छौं,’ चन्द्रखु गाउँका अगुवा पेम्बा लामाले भने ।

अझैसम्म सडक नजोडिएको जुगल गाउँपालिकाको दिपु, तेगादेखि तेम्बाथान गाउँबासी अझै टुकी र सोलारकै भरमा छन् । जुगलको गुम्बाथानमा चन्द्रखुमा जस्तै खम्बा र तार टाँगिएको तीन वर्ष भइसक्यो तर बिजुली आएको छैन ।

जुगलको दिपु, तेगा र तेम्बाथानसहित गरी झन्डै २ सय २० परिवार अँध्यारोमै छन् । ‘यहाँ न स्वास्थ्य चौकी छ, न सडक नै जोडिएको छ, बिजुली, नेटवर्कसमेत लाग्दैन,’ तेम्बाथानका साइला शेर्पाले भने ।

प्रकाशित : मंसिर १३, २०७७ ०९:४०
प्रतिक्रिया
पठाउनुहोस्

पोल मात्र गाडिए, बिजुली आएन

लाइन विस्तारका लागि चाहिने सामान नपाइँदा समस्या
वसन्तप्रताप सिंह

बझाङ — कतै बिजुलीका पोल गाडिएका छन् तर तार तानिएका छैनन् । कतै पोल, तार र ट्रान्सफर्मरलगायतका सामान बाटामा असरल्ल छन् । कुनै ठाउँमा पोल गाडेर तार तानेको भए पनि बिजुली बलेको छैन । बझाङका प्रायः गाउँमा दुई वर्षदेखि यस्ता दृश्य जताततै देखिन्छन् ।

राष्ट्रिय प्रसारण लाइनको विद्युत् गाउँगाउँमा पुर्‍याउन सुरु भएपछि जिल्लावासीले अँध्यारोबाट मुक्ति पाउने सपना बोकेका थिए । तर सबैतिर प्रगति भने न्यून छ । ‘पोल गाडेको वर्ष दिन भइसक्यो । अघिल्लो वर्ष फागुनमै बिजुली बल्छ भन्थे,’ जयपृथ्वी नगरपालिका–१ कैलासका अनिल कामीले भने, ‘अर्को फागुन आउन लागिसक्यो, पोलमा तार पनि तानेका छैनन् ।’

पोल गाड्न सुरु भएसँगै बिजुली बल्ने कुराले उत्साहित स्थानीय बीचैमा काम रोकिएपछि निराश भएको स्थानीय दल खड्काले बताए ।

विद्युत् आएपछि सानोतिनो उद्योगधन्दा खोलेर गाउँमै केही काम गर्ने सोच बनाएका युवा पनि बिदेसिन बाध्य भएको गाउँवासीको गुनासो छ । ‘अब विद्युत् आउने भयो । गाउँमै केही सीप गरेर खान्छौं भनेर बसेकाहरू पनि निराश भएर इन्डिया जान थालिसके,’ खड्काले भने । ठेक्का सम्झौता भएको दुई वर्षसम्म पनि बिजुली नबल्दा जयपृथ्वी नगरपालिकाको कैलास गाउँको मात्रै होइन, जिल्लाका ११ वटा पालिकाका दर्जनौं गाउँको अवस्था उस्तै छ ।

१२ वटा पालिका रहेको बझाङमा दुर्गम साइपाल गाउँपालिकाबाहेक अन्य स्थानीय तहमा राष्ट्रिय प्रसारण लाइन विस्तारका लागि ठेक्का भए पनि काम हुन सकेको छैन । करिब एक किलोमिटर ११ केभी मुख्य लाइन र १ हजार २ सय ५० मिटर शाखा लाइन विस्तारका लागि पोल गाड्ने, लाइन तान्ने, ट्रान्सफर्मर जडान गरी विद्युत् बाल्नेसम्मको काम सम्पन्न गर्न नेपाल विद्युत् प्राधिकरणको विद्युत् वितरण केन्द्र बझाङले विभिन्न समयमा टेन्डर आह्वान गरेको थियो । २ करोड ५० लाखमा सम्पन्न हुने लाइन विस्तारका लागि ११ वटा कम्पनीसँग ठेक्का सम्झौता भए पनि विभिन्न कारणले काम नसकिएको प्राधिकरणको विद्युत् वितरण केन्द्र बझाङका प्रमुख राकेसप्रसाद भट्टको भनाइ छ ।

८७ वटा ट्रान्सफर्मर जडान गर्ने जिम्मा पाएका ठेकेदार कम्पनीहरूले हालसम्म ३७ वटा जडान गरेका छन् । ट्रान्सफर्मर जडान भइसकेका धेरैजसो ठाउँमा पनि विद्युत् बल्न बाँकी रहेको प्रमुख भट्टले बताए । ‘काम ढिलो हुनुको मुख्य कारण लकडाउन हो । लकडाउन सकिएपछि बर्खाको समयले पनि भनेजस्तो काम भएन,’ उनले भने, ‘अहिले ठेकदारहरू काम गर्न तयार थिए तर लाइन विस्तारको लागि चाहिने सामानको अभावले समस्या भएको छ ।’ उनले बिजुलीका पोल, तार, ट्रान्सफर्मरलगायतका सामान खरिद प्राधिकरणको केन्द्रीय र क्षेत्रीय कार्यालयले गर्ने भएकाले आवश्यक सामान उतैबाट नआउँदा काम रोकिएको बताए । मंसिरभित्रै सामान आइपुग्ने आश्वासन पाएको उनले जानकारी दिए ।

प्रकाशित : मंसिर १३, २०७७ ०९:३९
पूरा पढ्नुहोस्
प्रतिक्रिया
पठाउनुहोस्
×