खेर गयो १० मेगावाट सौर्य बिजुली

चीनबाट ल्याउनुपर्ने तार र उपकरण कोरोनाका कारण केरुङमा रोकिएपछि १० मेगावाट जडित सौर्य ऊर्जा त्यत्तिकै परेको हो । देशकै ठूलो २५ मेगावाट ग्रिड सोलार जडान परियोजना विदुर नगरपालिका–६ देवीघाट जलविद्युत् केन्द्रको कोलोनीमा स्थापना गरिएको छ । १० मेगावाट बिजुली जलविद्युत् केन्द्रको सबस्टेसनबाट राष्ट्रिय प्रणालीमा जोड्न सकिएको छैन । देवीघाट कोलनीबाट आधा किमि दूरीमा तार जोडेर सबस्टेसनसम्म लैजानुपर्ने थियो । त्यसका लागि चाहिने सामान आएका छैनन् । उक्त बिजुली वैशाख दोस्रो साता राष्ट्रिय प्रसारण लाइनमा जोडिने विद्युत् प्राधिकरणको योजना थियो । कोरोनाका कारण नाका बन्द भएपछि चीनको केरुङबाट आयात गर्नुपर्ने तार र उपकरण थन्किएको छ । सामान नआएपछि प्यानलबाट उत्पादित बिजुली सबस्टेसनमा जोड्न नसकिएको आयोजनाका उपप्रबन्धक विकास रघुवंशीले बताए ।

सामान नआएपछि सोलार प्यानलको बिजुली सबस्टेसनमा जोड्न नसकिएको आयोजनाले जनाएको छ । सोलार प्यानल देवीघाट जलविद्युत् केन्द्रको कोलनीमा जडानको काम सकिएर सबस्टेसनमा जोड्न मात्र बाँकी छ । फोरवेमा जडान भई बिजुली उत्पादन सुरु भइसकेको छ । ग्रिड सोलार तथा ऊर्जा दक्षता परियोजनाअन्तर्गत नेपाल सरकार र विश्व बैंकको सहुलियतपूर्ण ऋण लगानीमा सोलार पावर निर्माण भइरहेको छ । आयोजनाको लागत ३ अर्ब ८० करोड रुपैयाँ छ ।