हेटौंडा — बागमती प्रदेश सरकारबाट एमालेले आफ्ना मन्त्रीहरुलाई सामूहिक राजीनामा गराएर सरकारबाट समर्थन फिर्ता लिने भएको छ ।

एमाले बागमती प्रदेश संसदीय दलका नेता जगन्नाथ थपलियाले मंगलबार साँझसम्म प्रदेश सरकारमा रहेका आफ्नो पार्टीका सबै मन्त्रीले राजीनामा दिने तयारी गरिएको बताए । ‘सकेसम्म मुख्यमन्त्रीलाई भेटेर दिन्छन्, भेट्ने वातावरण बन्न सकेन भने ईमेलबाट राजीनामा दिन्छन्,’ संसदीय दलका नेता थपलियाले भने ।  

एमाले बागमती प्रदेश संसदीय दलको सोमबारको बैठकले तत्काल सरकारबाट राजीनामा नगरेर पार्टी केन्द्रबाट स्पष्ट निर्देशन आएपछि मात्रै थप निर्णय गर्ने निष्कर्ष निकालेको थियो । पार्टी केन्द्रीय नेतृत्व र  संसदीय दलको नेतासमेतले सामूहिक राजीनामा दिने निर्देशन दिएकाले अहिले नै राजीनामा दिने तयारीमा जुटेको विना विभागी मन्त्री किरण थापाले बताए ।  

चार दिनअघि एमालेले सरकारलाई दिएको समर्थन फिर्ता लिएर सरकारमा रहेका आफ्ना मन्त्रीलाई राजीनामा दिन निर्देशन दिएको थियो । पछिल्लो राजनीतिक घटनाक्रमपछि एमालेले तत्काल राजीनामा नदिने निर्णय गर्दै नयाँ रणनीति अपनाएको थियो । तर अहिले एमालेले सरकारलाई दिएको समर्थन फिर्ता लिने र सरकारमा रहेका आफ्ना मन्त्रीलाई राजीनामा दिन निर्देशन दिएको हो । 

एमाले प्रदेश संसदीय दलका नेता थपलियाले बदलिदो राजनीतिक परिस्थितिलाई मध्यनजर गर्दै सरकारबाट समर्थन फिर्ता लिएर मन्त्रीबाट राजीनामा दिने तयारी गरिएको बताए ।

एमालेका एक केन्द्रीय नेताले नेकपासित मिलेर सरकार बनाउने विषयमा पार्टीको सहमतिनजिक पुगेकाले सरकारलाई दिएको समर्थन फिर्ता लिएर मन्त्रीहरुले राजीनामा दिन लागिएको बताए । बागमती सरकारमा एमालेका ६ जना मन्त्री रहेका छन् । मुख्यमन्त्री ईन्द्रबहादुर बानियाँको नेतृत्वमा हाल प्रदेशमा रहेका १४ मन्त्रालयलाई ८ कायम गरिएको छ । साउन १ बाट उक्त निर्णय कार्यान्वयन गर्दै ८ मन्त्रीलाई जिम्मेवारी दिएको छ भने ६ मन्त्रीलाई विना विभागीय मन्त्रीका रुपमा राखेका थिए ।