काभ्रे — २०८१ असोजको बाढी र पहिरो प्रभावित काभ्रेको पनौती नगरपालिका १२ का १४ परिवारका लागि आवास निर्माण कार्य सुरु गरिएको छ । 

जिल्लास्थित शान्ति जनआर्दश सेवा केन्द्रको नेपाल बाढी प्रतिकार्य परियोजना अन्र्तगत वडा १२ का एकल महिला, अपाङ्गता भएका व्यक्ति, विपन्न नागरिक, जेष्ठ नागरिकलाई पहिलो प्राथमिकतामा राखेर अहिले १४ परिवारको लागि आवास निर्माण कार्य अघि सारिएको हो । 

उक्त कार्यको लागि ह्याबिट्याट फर ह्युमनटी नेपाल र पनौती नगरपालिकाले आर्थिक सहयोग गरेको छ । जस अन्तरगत ह्याबिट्याट फर ह्युमनटी नेपालले ५५ प्रतिशत र पनौती नगरपालिकाले २५ प्रतिशत आर्थिक र २० प्रतिशत स्थानीयको श्रमदानमा आवास निर्माण भइरहेको छ । शनिबारबाट औपचारिक रुपमा केन्द्रले आवास निर्माण कार्य सुरु गरेको छ । निर्माण कार्यमा काभ्रेको पनौतीस्थित काभ्रे इङ्गलिस बोर्डिङ स्कुलका ४० जना शिक्षक कर्मचारीले श्रमदान गरेका थिए । 

एउटा आवास निर्माण गर्न श्रमदानबाहेक ६ लाख ५० हजार रुपैयाँ लाग्ने परियोजना संयोजक सुनिता तामाङले जानकारी दिइन् । उनका अनुसार सिमेन्ट ब्याम्बो फ्रेम टेक्नोलोजीबाट घर निर्माण गरिनेछ । ३ कोठा र १ वटा शौचालयसहित घर निर्माण गरिनेछ । शनिबारबाट आवास निर्माण कार्य थालनी भएको र भदौमा सम्पन्न गरेर प्रभावितहरुलाई हस्तान्तरण गर्ने लक्ष्य राखिएको उनले बताइन् । 

२०७२ को भूकम्पले स्थानीय कान्छी खत्रीको घर भत्किएपछि शान्ति जनआर्दश सेवा केन्द्र र क्याथोलिक रिलिफ सर्भिस (सिआरएस) ले उनको लागि घर बनाइदिएको थियो । उक्त घर २०८१ असोजको बाढी र पहिरो बगाएपछि कान्छी खत्री पुन: घरबारबिहीन भएकी थिइन् ।

एकल महिला एवं जन्मजात शारिरीक रुपमा अपाङ्गता भएकी कान्छीलाई आवासको व्यवस्थापनका लागि समुदाय स्तरमा छलफल भएको थियो । सोही क्रममा शान्ति जनआर्दश सेवा केन्द्रले उनको लागि फेरी पनि घर बनाइदिने भएको छ । केन्द्रले शनिबार सञ्चालन गरेको श्रमदान अन्तरगत कान्छी खत्रीको घरको शिलान्यास भएको छ ।