काभ्रे — काभ्रेपलाञ्चोकको पनौती नगरपालिका–१० स्थित खोपासी जलविद्युत् केन्द्र परिसरमा बिहीबार विपद् उद्धारसम्बन्धी संयुक्त कृत्रिम अभ्यास ‘हातेमालो’ सञ्चालन गरिएको छ । 

कार्यक्रममा आगलागी नियन्त्रण, खोंच तथा डुबानमा फसेका व्यक्तिको उद्धार, सवारी दुर्घटनालगायत विपद्का विभिन्न घटनाको कृत्रिम अभ्यास प्रदर्शन गरिएको थियो। अभ्यासमा नेपाली सेनाको मेहर गण धुलिखेल, जिल्ला प्रहरी कार्यालय काभ्रे, सशस्त्र प्रहरी बल नेपाल नं. १५ गण मुख्यालय पाँचखाल, नेपाल रेडक्रस सोसाइटी काभ्रे तथा एनसीसी आल्मुनाई एसोसिएसन काभ्रेको सहभागिता रहेको थियो। 

जिल्ला विपद् व्यवस्थापन समितिको आयोजना तथा पनौती नगरपालिकाको व्यवस्थापकीय सहयोगमा विपद् उद्धार अभ्यास भएको हो । कार्यक्रममा सम्बोधन गर्दै जिल्ला समन्वय समितिका प्रमुख दिपककुमार गौतमले काभ्रेले लगातार दुई वर्षदेखि विपद्को सामना गरिरहेकाले पूर्वतयारी र कृत्रिम अभ्यासजस्ता कार्यक्रमको आवश्यकता अझ बढेको बताए । यस्ता अभ्यासले विपद्को समयमा आफू मात्र होइन, अरूलाई समेत सुरक्षित राख्न सकिने सन्देश प्रवाह गर्ने उनको विश्वास छ ।