हेटौंडा — मकवानपुरका चार गाउँपालिकालाई पूर्णखोप सुनिश्चितता तथा दिगोपना गाउँपालिका घोषणा गरिएको छ ।

बिहीबार मकवानपुरगढी र बागमती गाउँपालिकालाई पूर्णखोप सुनिश्चितता तथा दिगोपना गाउँपालिका घोषणा गरिएको हो । बुधबार ईन्द्रसरोवर र भीमफेदी गाउँपालिकालाई पूर्णखोप सुनिश्चितता तथा दिगोपना घोषणा गरिएको थियो । 

मकवानपुरगढी गाउँपालिकाका जन्मदेखि १५ महिनाका ३६२ र १६ देखि २३ महिनासम्मका २३३ जना बालबालिकाले खोप लगाएका छन् । बागमती गाउँपालिकामा जन्मदेखि १५ महिनासम्मका ३४५ जना र १६ देखि २३ महिनासम्मका २९८ जना बालबालिकाले नियमित खोप पाएका छन् भने छुट भएका १२ जना बालबालिकाले पनि सबै खोप पाएको जनस्वास्थ्य कार्यालय मकवानपुरले जनाएको छ ।

गाउँपालिकाभित्रका १६ महिनादेखि २३ महिनासम्मका सबै बालबालिकाले सरकारले तोकेको पूर्ण खोप प्राप्त गरेको पुष्टि भएपछि यो घोषणा गरिएको हो । जनस्वास्थ्य कार्यालय मकवानपुरका जनस्वास्थ्य निरीक्षक बासुदेव रिमालका अनुसार   विभिन्न चरणको अनुगमन र प्रमाणीकरण प्रक्रिया पूरा गरेर मात्रै पालिकालाई पूर्ण खोप सुनिश्चितता घोषणा गरिन्छ ।