लगातारको वर्षाका कारण रोशी खोलामा पानीको सतह बढेपछि यात्रु तथा सवारीसाधनको सुरक्षालाई ध्यान दिँदै काभ्रे खण्डमा आवागमन रोकिएको छ।
काठमाडौँ — वर्षाका कारण रोशी खोलामा पानीको बहाव उच्च भएपछि सम्भावित जोखिमलाई ध्यानमा राख्दै बीपी राजमार्गमा सवारी आवागमन बन्द गरिएको छ।
जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक रविन विष्टका अनुसार मंगलबार मध्याह्न १२:३० बजेदेखि काभ्रेपलाञ्चोक जिल्लाका विभिन्न स्थानमा लगातार ठूलो पानी परिरहेको छ। वर्षासँगै रोशी खोलामा पानीको सतह बढ्दै गएपछि यात्रु तथा सवारीसाधनको सुरक्षालाई मध्यनजर गर्दै बीपी राजमार्गको काभ्रे खण्डमा सञ्चालन हुने सम्पूर्ण प्रकारका सवारीसाधनको आवागमन तत्कालका लागि रोक लगाइएको उनले जानकारी दिए।
अहिले राजमार्ग हुँदै जाने सवारीलाई जिल्लास्थित धुलिखेलमा र सिन्धुली जिल्लासँग सहकार्य गरेर खुर्कोट र नेपालथोकमा होल्ड गरिएको उनले बताए। सडकको अवस्थाबारे जानकारी लिएर मात्रै यात्रा गर्न प्रहरीले अनुरोध गरेको छ।
