मकवानपुरको महादेवटारमा फास्ट ट्र्याक सुरुङमा काम गर्दा फलामको उपकरण खस्दा उक्त घटना भएको हो ।
हेटौंडा — काठमाडौं–तराई/मधेश द्रुतमार्ग (फास्ट ट्र्याक) को भीमफेदी गाउँपालिका-८ महादेवटारमा सुरुङमा काम गर्ने क्रममा एक मजदुरको मृत्यु भएको छ । एकजना घाइते भएका छन् ।
मृत्यु हुनेमा बर्दियाका ३० वर्षीय गोपाल चौधरी हुन् । मकवानपुर थाहा नगरपालिका-५ सानोपाखाका २२ वर्षीय सन्तोष भोम्जन भने घाइते भएका छन् ।
सुरुङमा प्रयोग हुने फलामबाट बनेको उपकरण खसेर उनीहरु घाइते भएका थिए । दुवैलाई उपचारका निम्ति सोमबार बेलुका नै हेटौंडास्थित चुरेहिल अस्पतालमा ल्याइएको थियो । उपचारका क्रममा चौधरीको सोमबार राति ११ वजे मृत्यु भएको जिल्ला प्रहरी कार्यालय मकवानपुरले जनाएको छ । अर्का घाइतेको उक्त अस्पतालमा उपचार भइरहेको छ । दुर्घटनास्थल इलाका प्रहरी कार्यालय ठिगनबाट ११ किलोमिटर उत्तरतर्फ पर्छ ।
